Кулун тутарга көһө сылдьар аҕа уустарын общиналарын уочараттаах сийиэһэ ыытыллыаҕа
Бу күннэргэ көһө сылдьар аҕа уустарын общиналарын III сийиэстэригэр бэлэмнэнии буола турар.
Бу туһунан Ил Түмэн аҕыйах ахсааннаах норуоттар дьыалаларын сис кэмитиэтин салайааччыта Елена Голомарева бу курдук иһитиннэрдэ:
— Бүгүҥҥү күҥҥэ Юстиция министиэристибэтигэр өрөспүүбүлүкэҕэ 206 община бэлиэтэн турар. Кэлиҥҥи кэмҥэ улуустардааҕы аҕа ууһун общиналарын бэрэстэбиитэллэрэ министиэристибэлэр уонна биэдимистибэлэр уопсастыбаннай сэбиэттэригэр, биэдимисттибэлэр икки ардылпарынааҕы хамыыһыйаларга киирэн үлэлэһэллэр. Ону тэҥэ «Общиналар тустарынан» , «Тыа хаһаайыстыбатын туһунан», «Дьиэ табатын туһунан» сокуоннары дьүүллэһиигэ актыыбынай кыттыыны ылаллар. Биһиги, дьокутааттар, кинилэри кытта үгүстүк сүбэлэһэбит.
Общиналар салайааччыларын кытта бииргэ үлэлээн, бултааһын ороскуотун толуйар сөбүлэҥ нөҥүө туруорсан, үбүлээһини тобулуу общиналар материальнай- тиэхиньиичэскэй баазаларын сайыннарыыга төһүү күүһүнэн буолла.
2012, 2017 сылларга ыытыллыбыт сийиэстэр түмүктэринэн көһө сылдьар табаһыт дьиэ кэргэннэргэ, эдэр табаһыттарга анал бырагыраамалар үлэҕэ киирэн, тыа сирин олохтоохторугар үгүс өрүттээх көмө оҥоһулунна. Онон аҕа уустарын общиналарын III сийиэстэриттэн үгүс түмүктээх үлэни кэтэһэбит.
Елена ПОТОЦКАЯ, “Саха сирэ” хаһыат, edersaas.ru
Хаартыска — Елена Голомарева тиксэриитэ.