Кулун тутар 25 күнүттэн «Миигин кытта үҥкүүлээ» ыччат мелодрамата көстүөҕэ

Бөлөххө киир:

Кулун тутар 25 күнүттэн Саха сирин бары киинэ тыйаатырдарыгар «Миигин кытта үҥкүүлээ» диэн сахалыы саҥа киинэ көстүөҕэ. Трейлериттэн көрдөххө, киһи сүргэтин көтөҕөр киинэ буолсу.

«Миигин кытта үҥкүүлээ» киинэни эдэр режиссер Никандр Фёдоров 2019 сыллаахха доҕорун Андрей Егоровы кытта устан саҕалаабыт. Уолаттар А.Д.Макарова аатынан Дьокуускайдааҕы култуура уонна искусство кэллиэһин бүтэрбиттэр, доҕордуулар. Никандр Уус Алдан улууһун Бэйдиҥэтиттэн, оттон Андрей Мэҥэ Хаҥалас улууһун Аллараа Бэстээҕиттэн сылдьаллар.

Саҥа тахсаары турар киинэ туһунан биһиги ааҕааччыларбытыгар анаан продюсер, «Тарагай Синема» киинэ устуудьуйатын салайааччы Семен Шишигин маннык кэпсиир:

— «Миигин кытта үҥкүүлээ» киинэҕэ Никандр Фёдоров сценарий суруйан, режиссердаан, оттон операторынан Андрей Егоров үлэлээннэр, 2019 сыллаахха Нам Никольскайыгар устан саҕалаабыттар. Оччолорго бэйэлэрин күүстэринэн «Санаа Синема» диэн киинэ устар устуудьуйа тэринэн, толкуйдаабыт киинэлэрин аҥаарын бэлэмнээбиттэр. Оттон мин кинилэри кытта ол сыл балаҕан ыйыгар Дьокуускайга «Лена» киинэ тыйаатырыгар буолбут сахалыы саҥа киинэлэр тула буолбут мунньахха билсибитим. Уолаттар киинэлэрин бырайыак быһыытынан кэпсээн, салгыы усталларыгар, киэҥ эйгэҕэ таһааралларыгар продюсер, өйөбүл наадатын иһитиннэрбиттэрэ.

Мин Никандр киинэтин каадырдарын идэтийбит таһымҥа туруоран, таҥан устубутун сөхпүтүм. Көрөөт даҕаны, киинэ хампаанньатын кытта үлэлэһэр, сыалай устар хамаанда үлэтэ эбит дии санаабытым. Ол мунньах сарсыҥҥытыгар миэхэ «Лена» киинэ тыйаатырын менеджерэ Георгий Николаев эрийэн: «Бэҕэһээ Никандр Фёдоров диэн уол үлэтин бэлиэтии көрдүҥ дуо? Уолаттар туораттан көмөтө суох бэйэлэрэ уста сылдьаллар эбит. Кинилэри кытта билсэн, киинэни таһаарага көмөлөһүөҥ дуо?» — диэн көрдөспүтэ. Мин тута бу киирбит этиигэ сөбүлэһэн, Никандрдаах Андрейы кытта кэпсэппитим уонна бииргэ үлэбитин саҕалаабыппыт. Ол курдук, киинэбит бүтэһик каадырын быйыл тохсунньу 15 күнүгэр устан бүтэрбиппит. Салгыы таҥан, саҥатын-иҥэтин, тыаһын-ууһун, өҥүн оҥорон, бу ый 25 күнүгэр Сахабыт сирин көрөөччүлэригэр үлэбитин сүрэхтээри долгуйа сылдьабыт.

«Миигин кытта үҥкүүлээ» киинэбит жанра — ыччат мелодрамата. Манна бастакы сыһыан, таптал туһунан көстүөҕэ. Билигин киинэ тыйаатырдарбытыгар көстө турар сахалар уһулбут «Пугало», «Хара хаар» уонна «Рядовой Чээрин» курдук киһини дириҥ толкуйга, санааҕа аҕалар киинэлэр быыстарыгар, киһи үөрэ-көтө көрөр судургу хартыыната буолан таҕыста диэхпин баҕарабын. Бу ааттаабыт киинэлэри көрөн баран, дьон «олус ыарахан киинэлэр» диэн санааларын Интэриниэккэ үллэстибиттэрин аахпытым, онон кэрэҕэ, сырдыкка көҕүлүүр киинэбитин дьон ылыныа, биһириэ дии саныыбын. Киинэ тыйаатырдарбыт салалталара: «Билигин маннык киинэ олус наада», — диэннэр, киэҥ эйгэҕэ көрдөрөргө тута сөбүлэҥнэрин биэрбиттэрэ.

Режиссер Никандр Фёдоров — 25 саастаах. Киинэтигэр бэйэтин кытта саастыы доҕотторун, Дьокуускайдааҕы култуура уонна искусство кэллиэһин устудьуоннарын устубут. Хаһан даҕаны ханнык даҕаны киинэҕэ көстүбэтэх, уһуллубатах «саҥа дьон» буолаллар. Олус итэҕэтиилээхтик табыллан оонньоотулар. Киинэбит былаһын тухары саҥа сонун ырыалары истиэххит. Бу ырыалары эмиэ улахан сыанаҕа ыллаабатах дьон толорор.

Киинэ трейлерин көрүҥ:

Бу курдук талааннаах ыччаты «Тарагай Синема» тэрилтэ үбүнэн-харчынан, тиэхиньиичэскэй өттүнэн өйөөн, «Миигин кытта үҥкүүлээ» диэн киинэ кулун тутар 25 күнүттэн Саха сирин бары киинэ тыйаатырдарыгар көстүөҕэ. Киинэ нууччалыы субтитрдаах.

Саас кэлэн айылҕабыт уһуктар, күн уһуур үтүө күннэрин сахалыы саҥа киинэни көрөн, саһан сытар санааларгытын, иэйиилэргитин уһугуннараргытыгар ыҥырабыт!

Айтана Аммосова, edersaas.ru

Алексей Васильев хаартыскалара.

+1
0
+1
0
+1
0
+1
0
+1
0
+1
0
+1
0