Дьокуускайга Юрий Гагарин аатынан Култуура уонна аныгы искусство киинэ аһылынна

Бүгүн, балаҕан ыйын 13 күнүгэр, Дьокуускай куорат Гагаринскай уокуругар Култуура уонна аныгы искусство киинэ үөрүүлээхтик аһылынна. Тэрээһиҥҥэ Ил Дархан Айсен Николаев, Дьокуускай куорат баһылыга Сардаана Авксентьева кыттыыны ыллылар.

edersaas.ru

Ю.А. Гагарин аатынан урукку култуура дьиэтэ 1961 сыллаахха тутуллубута. 2016 сыллаахха дьиэ хаарбах туруктааҕын иһин көтөрбүттэрэ. Ол оннугар 5,2 тыһыынча квадратнай миэтэрэ иэннээх үс этээстээх тупсаҕай көстүүлээх эбийиэк тутуллубута куорат олохтоохторун хараҕар тута быраҕыллар буолла. Култуура уонна аныгы искусство киинин 2017 сылтан «Газэнергомонтаж» тутуу тэрилтэтэ тутан саҕалаабыта.

— 482 миэстэлээх киинэ уонна кэнсиэр көрдөрөр элбэх функциялаах интерактивнай саалалар, араас дьарыктары ыытар кэбиниэттэр, аныгылыы моһуоннаах буфет баар. Оҕолорго анаан босхо маастар-кылаастары, аһаҕас уруоктары ыытар былааннаахпыт. Култуура киинигэр айар киэһэлэр, мультимедийнай быыстапкалар ыытыллыахтара, – диэн Киин дириэктэрэ Евдокия Винокурова кэпсээтэ.

Култуура киинигэр Саха сирин авиациятын мусуойа киһи интэриэһин тардар.

Аныгы искусство киинигэр ойоҕос дьарыгырааччылар тыйаатырдара аһыллара былааннанар. Ону таһынан араас тиэмэлээх киэһэлэр, гитара, хор, дизайн, видеоны таҥыы, тыас-уус режиссурата, көмпүүтэргэ үөрэнии, программирование куруоһуоктара үлэлиэхтэрэ.

Саҥа култуура киинин үөрүүлээх аһыллыытыгар анаан-минээн кэлбит куорат олохтоохторун уонна ыалдьыттарын санааларын биллим.

Антонина Данилова (Бүлүү олохтооҕо), Наталья Степанова (Дьокуускай олохтооҕо), Августина Николаева (Дьокуускай олохтооҕо):

— Култуура киинэ аһылларын туһунан батсааптан билбиппит. Сиэннэрбитин култуураҕа, кэрэҕэ чугас буоллуннар диэн көрдөрө аҕалбыппыт. Маннык киин аһыллыбыта наһаа үчүгэй. Уруккуттан тутуу буоллун, өрөмүөн буоллун, авиапорт оройуона умнуллан иһэр этэ. Кэнники сылларга куорат бу эҥээрэ олус сайынна.

Лидия Слепцова, Дьокуускай олохтооҕо:

— Мин устудьуон сылларбын Арассыыйа киин куораттарыгар атаарбытым. Оччотооҕу саха устудьуоннара онно үөрэнэ сылдьан, Дьокуускайга кэллэхпитинэ куорат тас көстүүтүттэн хараастар этибит. Билигин Дьокуускай наһаа сайынна, тубуста, киэркэйдэ! Киһи көрө-көрө үөрэр буолла. Мин бу пуорт диэки олоробун. Онон Гагаринскай оройуон сайдан иһэриттэн, эдэр көлүөнэ сайдарыгар, кэрэҕэ талаһарыгар усулуобуйа үөскээн эрэриттэн ис сүрэхпиттэн астынабын. Куорат олохтоохторун Дьокуускайбытын харыстыахха, ыраастык тутуохха диэн ыҥырабын.

Виктория Бястинова, «Саха сирэ» хаһыат, edersaas.ru

Хаартыска: news.ykt.ru, ааптар.