Кулун тутар 20-30 күннэригэр өрөспүүбүлүкэҕэ Култуура үлэһитин күнүгэр аналлаах декада ыытылла турар.
Ол курдук, кулун тутар 23 күнүгэр өрөспүүбүлүкэтээҕи Норуот айымньытын дьиэтин, “Хотугу сулус” телерадиоакадемия, Уус Алдан улууһун тэрийиилэринэн “Строительнай” ТД быыстапкалыыр саалатыгар өрөспүүбүлүкэ биллиилээх коллекционера, мелодиһа, музыкана, ССРС үтүөлээх пилота, Үлэ Дьоруойа Валерий Кузьмин аатынан бириэмийэ лауреата Станислав Луковцев персональнай быыстапката аһылынна. Бүгүн, кулун тутар 25—Култуура үлэһитин күнүгэр, кини “Сырдык үөрүү” диэн саҥа ырыанньыгын сүрэхтэниитигэр Уус Алдантан “Дуолан” ансаамбыл, бастыҥ ырыаһыттар, мелодистар кытталлар.
Ити курдук, Дьокуускайга бу күннэргэ култуура бастыҥнара түмсэннэр, айар талааннарын, дьоҕурдарын киэҥ көрөөччүгэ таһаараллар.
Бүгүн Мэҥэ-Хаҥаластан, Намтан, Сунтаартан, Чурапчыттан, Бүлүүттэн, Алдантан, Аллайыахаттан, Мииринэйтэн тиийэ бастыҥ үҥкүү кэлэктииптэрэ, вокальнай ансаамбыллар, норуодунай кэлэктииптэр, ырыаһыттар, оригинальнай жанр артыыстара кэлэннэр, бырааһынньыктааҕы кэнсиэр көрдөрө сылдьаллар.
«Куйуур Олоҥхото -2018»
Төрүт култуурабытын, фольклорбутун араҥаччылааччылар, чинчийээччилэр, тарҕатааччылар эмиэ, хаһан да буоларын курдук, олус түмсүүлээхтэр, көхтөөхтөр. Ол курдук, кулун тутар 23-24 күннэригэр Мэҥэ-Хаҥалас улууһун I Тыыллыма нэһилиэгэр өрөспүүбүлүкэтээҕи “Куйуур Олоҥхото” ыытылынна. Биллэрин курдук, үгэс быһыытынан сыл аайы тэрийиллэр маннык түһүлгэҕэ өрөспүүбүлүкэ бастыҥ ыччат-олоҥхоһуттара түмсэллэр.
Юрий БОРИСОВ, өрөспүүбүлүкэтээҕи «Ыччат Олоҥхоһут» уопсастыбаннай түмсүү салайааччыта, филологическай наука кандидата, Олоҥхо институтун секторын сэбиэдиссэйэ:
—Тэрээһиммит үрдүк таһымнаахтык ааста. Ыччаттар да, тэрийээччилэр да, бука бары үөрэн-көтөн, өрө көтөҕүллэн тарҕастыбыт.
Быйылгы сылга барыта 16 киһи кытынна. Ол иһигэр 9 биирдиилээн толорор ыччат уонна биир Уус Алдан улууһун бөлөҕө (салайааччы Антонина Лугинова).
Тыҥааһыннаах киирсии түмүгүнэн, Гран-При үрдүк аатын АГИКИ 2-с кууруһун устудьуона Анастасия Алексеева ылла. I истиэпэннээх диплом — Анисия Степанова, II истиэпэннээх диплом — Прасковья Лебедева, III истиэпэннээх диплом — Уус-Алдан бөлөҕө. Итини тэҥэ, номинацияҕа тигистилэр: Филиппов Петр — Сэһэн сүнньүн тутар олоҥхоһут, Наталья Стручкова — Тэтими тутар олоҥхоһут, Василий Новоприезжэй — Кылыһах ырыалаах, дорҕоон тойуктаах олоҥхоһут, Софья Федотова — Кэскиллээх олоҥхоһут.
Бастаан, күөлгэ киирэн куйуурдааһын сиэрин-туомун, үлэтин-хамнаһын сиһилии көрдүбүт. Айылҕаҕа ис миинэ истибит. Ити кэннэ ойбон алларыыга, чээй өрүүгэ, куйуурдаһыҥҥа түөлбэлэринэн күрэҕи көрдүбүт-иһиттибит. Онтон ойбонтон субу ойон тахсыбыт собону тута мииннээн испиппит үчүгэй да эбит этэ!
Дьэ, ол кэннэ киэһээ 19 чаастан саҕалаан, оллоонноон олорон эрэ, олоҥхобутун иһиттибит.
Түгэнинэн туһанан, өрөспүүбүлүкэтээҕи «Ыччат Олоҥхоһут» уопсастыбаннай түмсүү аатыттан, бу тэрээһиммит үрдүк таһымнаахтык ааһарыгар күүс-көмө, сүбэ-ама буолбут бырайыак ааптарыгар Галина Семеновна Поповаҕа — Санаайаҕа, Олоҥхо уон сылын тэрийэн ыытар Национальнай кэмитиэккэ, Олоҥхо институтугар, Олоҥхо тыйаатырыгар, Мэҥэ-Хаҥаластааҕы Олоҥхо дьиэтигэр, Ыччат министиэристибэтигэр, Бастакы Тыыллыма нэһилиэгин дьаһалтатыгар истиҥ-иһирэх махталбытын тиэрдэбин. Инникитин да бу курдук ситимнээхтик, утумнаахтык үлэлиэххэйиҥ диэн ыҥырабын!
Татьяна МАРКОВА, edersaas.ru