Маны аах Уопсастыба

Култуура волонтердара мэдиссиинэ тэрилтэлэрин аахсыйаларыгар кытталлар

Култуура волонтердара мэдиссиинэ үлэһиттэригэр нэһилиэнньэҕэ быһыыны туруорары тэрийэргэ көмөлөһүөхтэрэ. Оттон бу күннэргэ култуура сорох тэрилтэлэригэр коронавирус утары быһыыны туруорар мобильнай пууннар үлэлиэхтэрэ.

Ол курдук, быһыыны оҥорор биир пуун «Ночь вакцинации» аахсыйа иитинэн эстрада тыйаатырыгар ыам ыйын 18 күнүттэн 19 күнүгэр диэри  киэһээ 21.00 чаастан сарсыарда 07.00 чааска диэри үлэлиир. Маны таһынан, эмиэ манна ыам ыйын 21-22 уонна ыам ыйын 22-23 күннэригэр үлэлиэ. А.С.Пушкин аатынан нуучча драматическай тыйаатырыгар быһыыны туруорар пуун эмиэ үлэлиир. Паспоргытын, ОМС уонна СНИЛС полискытын илдьэ кэлэҕит. Тэрийэр үлэҕэ култуура волонтердара кытталлар.
«Култуура волонтердарын мэдиссиинэ үлэһиттэригэр быһыыны туруоруу тэрээһинигэр кыттаргытыгар ыҥырабын. Билэргит курдук, өрөспүүбүлүкэҕэ 122 тыһыынчаттан тахса киһи коронавирус утары быһыыны ылбыт. СӨ Ил Дархана Айсен Николаев РФ Бырабыыталыстыбатын суһал ыстаабыгар Саха сиригэр быһыы саҥа партиятын суһаллык аҕалыыны туруорсан, быһаары түргэнник ылыныллыбыта. Ил Дархан туһаайан этиитин өйөөн, култуура тэрилтэлэригэр быһыыны оҥорор эбии пууннар аһыллаллар. Мэдиссиинэ үлэһиттэрэ коронавируһу утары охсуһалларыгар биһиги көмөлөһүөхпүт«, — диэн СӨ Култуура уонна духуобунай сайдыы миниистирин бастакы солбуйааччы Владислав Левочкин култуура үлэһиттэригэр туһаайан эттэ.
Манна уон аҕыстарыттан үөһээ саастаахтар быраастарга көмөлөһүөхтэрин уонна бэйэлэрин кылааттарын киллэрсиэхтэрин сөп. Ыйытыылаахтар култуура волонтердарын эрэгийиэннээҕи координаторыгар Тергюлева Ирина Петровнаҕа (89644246877, 506-396) эрийэҕит.
Бэлиэтээн эттэххэ, култуура волонтердара ковиды утары үлэҕэ көхтөөхтүк кытталлар. 2020 сыл муус устар ыйыттан МЫВМЕСТЕ бүтүн Арассыыйатааҕы аахсыйа #культураспешитнапомощь аахсыйата саҕаламмыта.
0
0