Култуура волонтердара Арассыыйаҕа 10 бастыҥ хамсааһын кэккэтигэр киирдилэр
Ыччат бэлиитикэтин Бүтүн Арассыыйатааҕы сэминээр-мунньаҕар “Култуура волонтердарын” тэрийиигэ Арассыыйа 10 бастыҥ эрэгийиэнин хамсааһынын ааттаатылар. Саха сирэ бастыҥнар кэккэлэригэр киирдэ.
“Култуура эйгэтигэр үлэлиир дьон – дьоллоохтор. Биһиги үүнэр көлүөнэҕэ култуура сыаннаһын, нэһилиэстибэтин тиэрдэр улахан эппиэтинэһи сүгэбит. Бу суолталаах дьыалаҕа волонтердар хамсааһыннара улахан оруоллаах. Быйыл олунньуга ыытыллыбыт култуура волонтердарын өрөспүүбүлүкэтээҕи пуорума Саха сиригэр хамсааһын сайдыытын саҕалаабыта. Өрөспүүбүлүкэҕэ барыта 390-тан тахса волонтер бэлиэтэнэр. Соторутааҕыта биһиги волонтердарбыт «#МыВместе» диэн хардарыта көмөлөһүү Бүтүн Арассыыйатааҕы аахсыйатын тэрийиигэ тугунан да кэмнэммэт кылааттарын киллэриилэрин иһин Арассыыйа бэрэсидьиэнин мэтээлинэн наҕараадаланан тураллар. Өрөспүүбүлүкэбит култууратын волонтердарын 10 бастыҥ кэккэтигэр киирбиттэринэн эҥэрдэлиибин” – диэн СӨ култууратын уонна духуобунай сайдыытын миниистирэ Юрий Куприянов бэйэтин эҕэрдэтин тиэрдэр.
Санатан эттэххэ, “Култуура волонтердара” хамсааһын “Култуура” национальнай бырайыак “Айар дьон” федеральнай бырайыагын олоххо киириитин иитинэн тэриллибитэ. Саха сирэ Уһук Илин уокурукка волонтердар хамсааһыннарынан биир бастыҥынан ааттанар. Өрөспүүбүлүкэҕэ 390-тан тахса волонтер баара биллэр. Быйыл сайын култуура волонтердара хаһыыларга уонна устуоруйа пааматынньыктарын чөлүгэр түһэриигэр көхтөөхтүк кытыннылар.
Соторутааҕыта «#МыВместе» хардарыта көмөлөһүү Бүтүн Арассыыйатааҕы аахсыйатын тэрийиигэ тугунан да кэмнэммэт кылааттарын иһин, Саха сирин тустаах волонтердара, дойду бэрэсидьиэнэ Владимир Путин дьаһалынан олохтоммут Арассыыйатааҕы ыччат мэтээлинэн наҕараадаламмыттара. Наҕараадаламмыттар кэккэлэригэр Саха сирин национальнай бибилэтиэкэтин, Марфа уонна Сергей Расторгуевтар ааттарынан Цииркэ, Эстрада тыйаатырын, Ярославскай түмэлин волонтердара бааллар. Быйыл саас дьиэҕэ олорор өрөспүүбүлүкэ саастаах дьонугар аһылык нобуордарын таспыттара.
СӨ Култууратын уонна духуобунай сайдыытын министиэристибэтин пресс-сулууспата.