Аҕыйах хонуктааҕыта Култуура уонна искусство Арктикатааҕы судаарыстыбаннай института оскуола үөрэнээччилэригэр анаан “аһаҕас аан” күнүн ыытта. Манна Дьокуускай куорат оскуолаларыттан, чугастааҕы улуустартан үөрэнээччилэр, учууталлар, ыалдьыттар, эбээлэр-эһээлэр сырыттылар.
“Саха сирэ” хаһыат, edersaas.ru
Бу күн кэлбит дьону устудьуоннар хас даҕаны бөлөххө араартаан, институт устун эксурсия тэрийдилэр. Салгыы тус-туспа салааларынан кэритэн көрдөрдүлэр. Оҕолор артыыс идэтигэр уһуйуллар устудьуоннар хайдах үөрэнэллэрин билистилэр. Кафедра дассыана Мария Маркова биллэр артыыстартан институкка кимнээх үлэлииллэрин, кимнээх бүтэрбиттэрин кэпсээтэ. Онтон устудьуоннар “Кыыс Дэбилийэ” олоҥхоттон быһа тардыыны туруорбуттарын, оҕолор биир тыынынан көрдүлэр. Манна “Мин үрдүбэр күн хаһан да киирбэт” киинэҕэ оонньообут Ваня Константинов баарын истэн: “Ээ”, — дэһэ түстүлэр.
Норуот уус-уран култууратын кафедратыгар киирэн, оҕолор кырыымпаны харахтарынан илэ көрөн, тыаһын истэн сэргээтилэр. Инструмен маастардара кимнээҕин, араастарын, туох матырыйаалтан оҥоһуллубуттарын билистилэр.
Салгыы хореография саалатыгар баран 2-с куурус устудьуоннарын кытта аҕыйах хамсаныыны үөрэтэн, тэҥҥэ аныгы үҥкүүнү үҥкүүлэстилэр. Уруһуй, дизайн, уо.д.а. кафедралар үлэлэрин билистилэр.
Онтон трениҥҥэ тиийбиттэригэр устудьуоннар араас кистэлэҥ хамсаныылары көрдөрүлэр эрээри, хайдах оҥоһулларын арыйбатылар: “Биһиги институппутугар устудьуон буоллаххытына барытын билиэххит”, — диэн көөчүктээтилэр.
Үлэһиттэр Култуура уонна искусство Арктикатааҕы институтугар ханнык салаалар баалларын, үөрэххэ киирэргэ туох ирдэбиллээхтэрин, устудьуоннар ханна олороллорун, истипиэндьийэлэрэ төһөтүн – барытын сиһилии кэпсээтилэр, оҕолор хас биирдии ыйытыыларыгар хоруйдаатылар.
Хаҥалас улууһун Үөдэй оскуолатын 11-с кылааһын үөрэнээччитэ Аюран Филиппов: “Эһиил оскуоланы бүтэрэбин. Билигин сынньалаҥмыт кэмэ. Онон институкка “аһаҕас аан” күнэ буолар үһү диэн истэн кэллим. Артыыс буолар баҕа санаалаахпын. Бүгүн ордук олоҥхоттон быһа тардыллыбыт испэктээги сэҥээрдим”, — диэн санаатын үллэстэр.
Тэрээһин кыттыылаахтара түмүккэ институт түмэлигэр сырыттылар. Оҕолор манна ордук муусука үстүрүмүөннэрин сэҥээрдилэр, бэл диэтэр, көрдөһөн тутан-хабан көрдүлэр.
Людмила ПОПОВА, “Саха сирэ” хаһыат, edersaas.ru
Ааптар хаартыскаҕа түһэриилэрэ.