Култуура уонна искусство Арктикатааҕы судаарыстыбаннай институгар бүддьүөт миэстэтэ икки т...
Олох-дьаһах

Култуура уонна искусство Арктикатааҕы судаарыстыбаннай институгар бүддьүөт миэстэтэ икки төгүл эбилиннэ

Бүгүн, бэс ыйын 18 күнүгэр, Култуура уонна искусство Арктикатааҕы судаарыстыбаннай института быйылгы туттарсыы уратытын туһунан видео-сибээс көмөтүнэн пресс-кэмпириэнсийэни  тэрийэн ыытта.

edersaas.ru

Үөрэх кыһатын ректора Саргылаана Игнатьева уонна үөрэх салаатын, хаапыдаралар сэбиэдиссэйдэрин уонна тутар хамыыһыйа эппиэттиир  сэкирэтээрин кытта суруналыыстар онлайн көрсүһүүлэрэ бэрт сэргэхтик ааста.

Суруналыыстар туттарсыы болдьоҕун, саҥа идэлэр, төлөбүрдээх үөрэх туһунан ыйыттылар.

Култуура уонна искусство Арктикатааҕы судаарыстыбаннай институтугар үөрэниэн баҕалаах абитуриеннар бэс ыйын 19 күнүттэн сайабылыанньаларын, докумуоннарын институт саайтыгар онлайн туттарыахтарын сөп. Тутар хампаанньа быйыл тэйиччиттэн ньыманан үлэлиэҕэ. Докумуоннары туттарыыга “электроннай илии баттааһын” уонна мэдиссиинэ ыспыраапката ирдэммэт.

Үөрэх кыһатыгар айар сатабыл эксээмэнэ ыытыллар буолан, докуомуну туттарыы бүтэһик күннэрин атырдьах ыйын 17-18 күннэрин кэтэспэккэ, эрдэттэн ыытар ордугун кыһа ректора бэлиэтээн эттэ. Быйыл институт 21 хайысхаҕа үөрэххэ ылар. Ону таһынан хас да саҥа идэлэр арыллыбыттар. Ол курдук цифровой мусуой үлэһитэ, креативнай индустрия үлэһитэ, цифровой  дизайнер курдук билиҥҥи кэм  ирдэбилигэр тоҕоостоох саҥа идэлэр салаалара абитуриеннары күүтэллэр.

Кэлэр үөрэх дьылыгар  бүддьүөт миэстэтэ икки төгүл эбиллибит. Ол курдук, 170  бүддьүөт миэстэтигэр туттарсан көрүөххэ сөп. Ону таһынан төлөбүрдээх үөрэх сыаната үрдээбэтэх.

Сылын аайы туттарсыы куонкуруһа үрдүк. Былырыын биир миэстэҕэ  ортотунан 5 абитуриент  туттарсар эбит.

 

Ньургуйаана Иванова, “Саха сирэ” хаһыат, edersaas.ru

Хаартыска — интэриниэттэн

 

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

четыре + четыре =