60-рын ааспыт аҕам саастаах дьон култуура тэрилтэлэригэр чэпчэтиилээх билиэти ылан сылдьыахтарын сөп. Чэпчэтиилээх билиэт ылар туһуттан каасаҕа коронавируһу утары быһыыны ылбытын туһунан ыспыраапканы көрдөрүөхтээх.
Култуура, духуобунай сайдыы министиэристибэтэ иһитиннэрбитинэн, маннык чэпчэтиилээх билиэтинэн ыам ыйын 1 күнүттэн тыйаатырга, судаарыстыбаннай музыкальнай тэрилтэлэргэ, мусуойдарга сылдьыахха сөп. Ол эрээри, бу өҥө быстах кэмҥэ буолар, министиэристибэ ханнык баҕарар күҥҥэ тохтотон кэбиһиэн сөп. Онон быһыыны ылбыт аҕам саастаах дьон бу кэми мүлчү туппакка, култуура тэрилтэлэригэр сылдьан хаалыахтарын сөп.
Бу миэрэни элбэх киһи, ордук сааһырбыт дьон коронавируһу утары быһыыны ылалларын туһуттан киллэрдилэр. Чэпчэтиилээх билиэти атыылаһарга каассаҕа №156/у-93 көрүҥнээх ыспыраапканы, эбэтэр профилактическай быһыы сэртипикээтин, ону тэҥэ, төлөпүөҥҥэ “Госуслуги” сыһыарыыны арыйан көрдөрүөххэ сөп.
Билигин култуура тэрилтэлэрэ бары харыстанар миэрэлэри тутуһан, үлэлии тураллар. Тыйаатырга, кэнсиэркэ саала туолуута 50 % буолуохтаах. Мусуойдарга, бибилэтиэкэлэргэ элбэх киһилээх маассабай тэрээһиннэр бобуллубуттара. Өрөспүүбүлүкэҕэ маассабай култуурунай-аралдьытар тэрээһиннэр, гостуруоллар тохтотуллубуттара.
Ангелина Васильева, “Саха сирэ” хаһыат, edersaas.ru