Доруобуйа Маны аах

Култуура тэрилтэлэрэ QR-куодунан киллэрии үлэтин саҕалаан эрэллэр

Алтынньы 20 күнүттэн Саха сиринээҕи култуура тэрилтэлэригэр COVID-19 вакцинаны ылбыты эбэтэр QR-куодунан бигэргэммит ыалдьыбытын туоһулуур сэртипикээттээх уонна чопчу бу киһи буоларын дакаастыыр докумуоннаах эрэ дьон киирэр кыахтаныахтара.

edersaas.ru

Хомойуох иһин, тустаах миэрэ — кэм ирдэбилэ. Алтынньы 20 күнүттэн көрөөччүлэр тыйаатырдарга, кэнсиэр тэрилтэлэригэр, киинэ тыйаатырдарыгар, цииркэлэргэ, түмэллэргэ,  бибилэтиэкэлэргэ, бары быыстапкалыыр саалаларга, култуура дьиэлэригэр, култуурунай-сынньатар миэстэлэргэ, айар устуудьуйаларга киириилэрэ уларыйыаҕа. Өрөспүүбүлүкэ муниципальнай тэриллиилэрэ эмиэ тустаах миэрэни тутуһалларыгар сүбэлээтибит. Бу миэрэ дьаҥ салгыы тарҕаныытын түргэнник тохтоторугар эрэнэбит. Итиэннэ култуура тэрилтэлэригэр сылдьар дьоҥҥо уустугу үөскэтиэ суохтаах. Бүгүҥҥү күҥҥэ дьону түргэнник киллэриини тэрийиигэ үлэ барар. Уочарат суох буолуохтаах. Онтон көрөөччүлэри QR-куодтаах сэртипикээти ыларгытыгар ыҥырабыт, бу судургу”, — диэн СӨ култууратын уонна духуобунай сайдыытын миниистирэ Юрий Куприянов бэлиэтээтэ.

Сэртипикээти судаарыстыбаннай өҥө порталыгар «Госуслуги» сыһыарыыттан эбэтэр «Госуслуги.СТОП Коронавирус» ылыаххытын сөп.

Порталга ыйыллыбытынан, быһыыны ылбыты туоһулуур QR-куодтаах сэртипикээт вакцина бүтэһик дозатын ыллахха кэлэр. Ыалдьа сылдьыбыты туоһулуур QR-куодтаах сэртипикээт — COVID-19 диагноһа докумуонунан бигэргэммит буоллаҕына. QR-куодтаах ПЦР-тест түмүгэ, анаалыһы судаарыстыбаннай өҥө порталыгар ыытар лабораторияларга эрэ туттардахха киирэр.

QR-куоду көрдөрбүт төрөппүттэр оҕолоро култуура тэрилтэлэригэр  QR-куода суох киириэхтэрин сөп.

Санатан эттэххэ, быһыыны ылбыты туоһулуур сэртипикээти көрдөрдөххө тыйаатырдарга 10 %, бастайааннай экспозициялаах түмэллэргэ 50 %-ҥа тиийэ чэпчэтии көрүллэр буолбута хаһыс даҕаны ыйыгар барда.

СӨ Култууратын уонна духуобунай сайдыытын министиэристибэтин пресс-сулууспата.

 

0
0