«Култуура» национальнай бырайыак: оҕо ускуустубатын оскуолалара саҥа үстүрүмүөннэниэхтэрэ
«Култуура» национальнай бырайыагынан оҕо ускуустубатын оскуолалара саҥа үстүрүмүөннэниэхтэрэ.
Өрөспүүбүлүкэҕэ национальнай бырайыак үһүс сылын үлэлиир. Бу бырайыак хайысхаларын туһунан социальнай ситимнэринэн быһа сибээскэ СӨ Култуура уонна духуобунай сайдыы миниистирин бастакы солбуйааччы Владислав Левочкин кэпсээн турар.
Владислав Левочкин быйыл бырайыагынан оҕо ускуустубатын оскуолаларын саҥа музыкальнай үстүрүмүөннэринэн хааччыйар, ону таһынан 11 модельнай бибилэтиэкэ арылларын туһунан эппитэ. Маны сэргэ, национальнай бырайыак «Култуура эйгэтэ» хайысхатынан култуура тэрилтэлэрэ тутуллаллар уонна өрөмүөннэнэллэр.
Кини эбии ыытыллыбыт күрэс түмүгүнэн ааспыт нэдиэлэҕэ Мэҥэ Хаҥаласка өссө икки тыа сирин бибилэтиэкэтэ үбүлээһиҥҥэ тиксибиттэрин иһитиннэрдэ.
Быйыл Нам улууһугар Аппааныга култуура дьиэтэ тутуллан бүтүөхтээх, Нерюнгри уонна Амма оройуоннарыгар икки култуура дьиэтигэр өрөмүөн ыытылла турар. Национальнай бырайыак иитинэн Зырянкаҕа уонна Алдаҥҥа ускуустуба икки оскуолата өрөмүөннэнэр.
Маны таһынан, национальнай бырайыак волонтердар хамсааһыннарын сайыннарарга «Айар дьоҕурдаах дьон» диэн хайысхалаах. Бу хайысханан култуура эйгэтин үлэһиттэрэ квалификацияларын үрдэтэн үөрэнэллэр. Быйылгы сылга култуура эйгэтин 450 үлэһитэ квалификациятын үрдэтэр. Бу туһунан Yakutia-Daily.ru суруллар.
+1
+1
+1
+1
+1
+1
+1