Култуура Маны аах

«Култуура» национальнай бырайыак: Аммаҕа ускуустуба оскуолата саҥа үстүрүмүөннэннэ

«Култуура» национальнай бырайыак иитинэн Аммаҕа ускуустуба оскуолатыгар муусука үстүрүмүөннэрэ уонна саҥа тэриллэр аҕалылыннылар.
Аммаҕа А.А.Черемных аатынан оҕо ускуустубатын оскуолатыгар саҥа ылбыт муусука үстүрүмүөннэрин уонна тэриллэрин биһирэмэ буолла диэн УлуусМедиа иһитиннэрэр. Бу «Култуура» национальнай бырайыак иитинэн ылыллыбыт.
Саҥа тэриллэнэн үөрбүт-көппү дьону СӨ Култуура уонна духуобунай сайдыы миниистирин солбуйааччы Марина Силина куйаар ситиминэн эҕэрдэлээтэ.

Үөрэх хаачыстыбата салгыы өссө тупсарыгар эрэл улахан. Оҕолор сыал-сорук да туруорунан үөрэнэллэрэ элбиэҕэ. Араас күрэстэргэ, бэстибээллэргэ ситиһиилэниэхтэрэ. Тус бэйэм ааппыттан, пианистка быһыытынан, саҥа рояль ылбыккытынан эҕэрдэлиибин, — диэтэ Марина Силина.

«Култуура» национальнай бырайыак чэрчитинэн, оскуолаҕа 6,8 мөл. кэриҥэ солк. көрүллүбүт. Үөрэнэр тэриллэр, нота уонна методическай литература, кэнсиэртиир саалаҕа уот-күөс, тыас-уус тэриллэрэ, компьютернай тиэхиньикэ, компьютернай графиканан дьарыктанарга графическай планшеттар, үҥкүү кылааһыгар LD тэлэбиисэр, банкеткалар, магниттаах дуоскалар, о.д.а. ылыллыбыттар, миэбэллэрэ кытары саҥардыллыбыт.

Сүрүн болҕомто муусука үстүрүмүөннэрин ылыыга ууруллубут. «Михаил Глинка» рояль, байааннар, аккордеоннар, балалайкалар, домралар, флейталар, о.д.а. элбэҕи үөрэ-көтө, астына ааттыыллар.

Үөрүүлээх тэрээһиҥҥэ улуус дьаһалтата, култуура управлениета, төрөппүттэр, уопсастыбаннас кыттыбыт. Муусука оскуолатын преподавателлэрэ уонна үөрэнээччилэр кэнсиэртээбиттэр, саҥа үстүрүмүөннэргэ оонньоон иһитиннэрбиттэр. Кэлэктиип СӨ Култуура министиэристибэтин, Амма улууһун дьаһалтатын, улуустааҕы култуура управлениетын уонна муусука оскуолатын кытта ыкса сибээстээх үлэнэн бырайыак олоххо ситиһиилээхтик киллэриллибитин бэлиэтиир.

Саҥа тэрилинэн, үөрэтэр-методическай литературанан хааччыллыбыт оскуола сайдыы саҥа таһымыгар тахсарыгар эрэллэрэ улахан.

 

0
0
Telegram @edersaas20