Нацбырайыактар

Култуура миниистирэ Юрий Куприянов Аммаҕа тутулла турар эбийиэктэргэ сырытта

СӨ култуураҕа уонна духуобунай сайдыыга миниистирэ Юрий Куприянов Амма улууһугар сылдьан «Култуура» национальнай бырайыак чэрчитинэн тутулла турар эбийиэктэр тутууларын көрдө-иһиттэ.

— А.А.Черемных аатынан Амматааҕы оҕо ускуустубатын оскуолатыгар 13,1 мөлүйүөн  солкуобай кээмэйдээх федеральнай субсидия ылбыппыт. Бэдэрээччиттэри уонна оройуон салалтатын кытта көрүстүм. Дьиэ ис өттүн оҥоруу бара турар. Дьиэ муостатын билиитэни оҥорбуттар. Дьиэ иһигэр ааннарын уларыппыттар, сыананы кэҥэппиттэр. Хас биирдии кэбиниэккэ тыаһы намтатар прибордары туруорбуттар. Оройуон салалтата оскуола сирин-уотун саҥардар, көҕөрдөр соруктаах. Оскуола тыа сиригэр тутуллубут бастакы таас оскуолалартан биирдэстэрэ. Үлэ барыта атырдьах ыйын 15 күнүгэр түмүктэниэҕэ. Балаҕан ыйын 10 күнүгэр оскуола выпускниктара уонна билиҥҥи көлүөнэ улахан кэнсиэринэн  оскуоланы үөрүүлээхтик аһыы буолуоҕа, — диэн миниистир кэпсээтэ.

Салгыы миниистир ханна сылдьыбытын улуус баһылыга Николай Архипов кэпсээтэ:

— Миниистир Юрий Куприянов Абаҕаҕа Устин Нохсоороп аатынан Абаҕатааҕы духуобунай кииҥҥэ сырытта. Бу эбийиэк хапытаалынай өрөмүөнэ эмиэ «Култуура» национальнай бырайыагынан 2023 сылга оҥоһуллуоҕа. Манна 15,2 мөлүйүөн солкуобай көрүллүөҕэ. Кэлэктиипкэ миниистир 100 тыһыынча солкуобайдаах  сэртипикээти туттарда. Киин бу харчы бэлэҕи көстүүмнэри тигиигэ ыытыаҕа. Манна киинэ көрөр сааланы уонна сыананы кэҥэппиттэр. Болкуон туппуттар. Эбии тэрил уонна светодиоднай экран ылбыттар. 292 миэстэҕэ тиийэ олорор сири улаатыннарбыттар. Онон биһиги култуура миниистирэ Юрий Куприяновка бииргэ үлэлээһин чэрчитинэн «Култуура» национальнай бырайыагы олоххо киллэриигэ улахан үлэни ыытарыгар уонна улуус дьаһалтатын кытта ыкса үлэлэһэригэр, тыа сирин сайыннарыыга бэйэтин тус кылаатын киллэрсэригэр махтал тылларын аныыбыт.

Елена ПОТОЦКАЯ «Саха сирэ» хаһыат

0
0
Telegram Whatsapp