Сыллата ыытыллар «Култуура марафона» аахсыйа быйыл сэтинньи 8 күнүттэн ахсынньы 10 күнүгэр диэри ыытыллар. Далааһыннаах тэрээһин киинэ историятыгар ананар.
Оскуола үөрэнээччилэригэр анаан онлайн-тест бэлэмнэниллибит. Маны таһынан, киинэ хайдах оҥоһулларыттан, уһулларыттан саҕалаан, режиссердар үлэлэригэр, туох албаһы тутталларыгар тиийэ билиэхтэрэ-көрүөхтэрэ. Бырайыагы Арассыыйа култуураҕа уонна үөрэххэ министиэристибэлэрэ итиэннэ Яндекс тэрийдилэр.
Марафон үөрэнээччилэр киинэни көрөллөрүн таһынан ырыталларыгар, дьүүллэһэллэригэр, художественнай айымньыны анаалыстыылларыгар, бэйэлэрин санааларын үллэстэллэригэр үөрэтэр соруктаах. Бырайыак иитинэн оҕолор киинэни уста үөрүйэхтээх, бу хайысхаҕа идэтийбит дьону кытары көрсөн сэһэргэһиэхтэрин, оскуолаларыгар киинэ кулуубун тэрийиэхтэрин, кыра киинэни устарга холонуохтарын сөп.
Анал сорудахтар бэлэмнэниллибиттэр. Марафоҥҥа кыттыан баҕалаахтар http://education.yandex.ru/culture киирэн регистрацияланаллар. Бырайыакка ким баҕалаах кыттар — учууталлар, үөрэнээччилэр, төрөппүттэр.
Кыттааччыларга саастарынан арааран эспиэрдэр араас сорудахтары бэлэмнээбиттэрин РФ Култуураҕа миниистирэ Ольга Любимова бэлиэтээбит. РФ Үөрэх миниистирэ Сергей Кравцов хас биирдии оҕо бэйэтэ сэҥээрэр, умсугуйар хайысхатынан дьарык буларыгар, үөрэтэр бырагыраамалар араастара элбэх, туһалаах буолара суолталааҕын ыйбыт. Итиэннэ бу ыытыллар «Культурнай марафон» оҕолор дьоҕурдарын арыйарга көмөлөһүөхтээҕин бэлиэтээбит. Онтон Арассыыйаҕа Яндекс генеральнай дириэктэрэ Елена Бунина марафон билиини-көрүүнү тургутар эрэ буолбакка, өссө саҥаттан-саҥаны билэргэ умсугутар соруктааҕын иһитиннэрбит.
2019 сыллаахха ыытыллыбыт «Культурнай марафоҥҥа» 590 тыһ. үөрэнээччи уонна 8 тыһ. тахса учуутал кыттыбыт. Аныгы култуура эйгэтигэр анаммыт. Онтон 2020 сыллаахха, Арассыыйа норуоттарын култууратыгар анаммыт марафоҥҥа, уопсайа 860 тыһ. үөрэнээччи уонна 28 тыһ. преподаватель кыттыбыта бэлиэтэнэр.
+1
+1
+1
+1
+1
+1
+1