Култуура

Култуура үлэһиттэрэ халаантан эмсэҕэлээбиттэргэ 1,3 мөлүйүөнтэн тахса солкуобайы хомуйдулар

“Вместе – мы сила!” телемарафон халаантан улаханнык эмсэҕэлээбит Кэбээйи уонна Дьааҥы оройуоннарыгар үбү хомуйда. СӨ култуураҕа уонна духуобунай сайдыыга  миниистирэ Юрий Куприянов, ону тэҥэ култуура тэрилтэлэрин салайааччылара уонна үлэһиттэрэ аһымал телемарафонугар кытыннылар.

Саха сирин култуураҕа уонна духуобунай сайдыыга миниистирэ Юрий Куприянов иһитиннэрбитинэн, бэс ыйын 26 күнүгэр киэһээҥҥи түмүгүнэн култуура уонна искусство өрөспүүбүлүкэтээҕи тэрилтэлэрэ 736 тыһыынча солкуобайы хомуйан, наадыйааччыларга салгыы тиэрдэр үлэ ыытыллар.

— Үбү-харчыны култуура тэрилтэлэрин чөлүгэр түһэриигэ, култуура үлэһиттэригэр көмөлөһүүгэ ыытыахпыт. Дьааҥы оройуонугар култуура түөрт муниципальнай эбийиэгин уу ылбыта:  Норуот айымньытын Дулҕалаахтааҕы киинин, Боронуктааҕы култуура дьиэтин, Адыаччытааҕы култуура уонна успуорт киинин, Суордаах норуот айымньытын дьиэтин. Бу тэрилтэлэргэ барыларыгар 100-түү тыһыынча солкуобайы ыыттыбыт. Билиҥҥи туругунан Дьааҥы оройуонун 71 үлэһитин 52 дьиэтэ уонна хаһаайыстыбаннай тутуута эмсэҕэлээбитэ. Кинилэргэ эмиэ көмөлөһүөхпүт. Кэбээйи оройуонугар култуура эбийиэктэрэ ууга ылларбатахтара. Сэбээн Күөлгэ култуура икки үлэһитин дьиэтэ түбэспитэ. Быһата, икки мөлүйүөн солкуобайга диэри  хомуйар соруктаахпыт, — диир Юрий Куприянов.

Миниистир салгыы эппитинэн, Олоҥхо тыйаатыра 20 тыһ солк. хомуйан, култуура сэттэ үлэһитигэр көмөлөһөргө, Дьокуускай мусуойа уонна муниципальнай мусуойдар уу харчынан 66 тыһ. солк. биэрдилэр.  Бу үбүнэн эмп-том, аһылык эҥин атыылаһылынна. Барытын Суһал штабка тиэртилэр.

Култуура муниципальнай тэрилтэлэрэ 153 тыһ солк. көмөлөстүлэр (Сүлдьүкээр сэл. “Биракан” култуура дьиэтэ, Беркакит бөһ. “Дружба” култуура дьиэтэ, “Дьабарыкы Хайатааҕы КДьК” тэрилтэ, Нерюнгритааҕы кииннэммит бибилэтиэкэ тиһигэ, Үөһээ Бүлүү улууһунааҕы идэлээх сойуус). Бу сууматтан саамай үгүөрүнү —  122 тыһ. солк. Арассыыйатааҕы култуура үлэһиттэрин идэлээх сойууһун   Үөһээ Бүлүүтээҕи тэрилтэтэ түмтэ.

Өрөспүүбүлүкэ бибилэтиэкэлэрэ эмиэ туора турбатылар. СӨ Национальнай бибилэтиэкэтэ 136700 солк. кээмэйдээх үбү хомуйда. Өрөспүүбүлүкэ бибилэтиэкэлэрэ билиҥҥи туругунан 402 тыһ. солк үбү уонна бастакы уочарат туттуллар  табаары көмөҕө биэрдилэр.

Онон култуура үлэһиттэрэ уопсайа 1,3 мөл солк. көмөлөстүлэр.

СӨ Култуураҕа уонна духуобунай сайдыыга министиэристибэтин пресс-киинэ

Хаартыска: Наталия Чемашкина

Бэлэмнээтэ Женни Стрюкова

0
0
Telegram @edersaas20