Култуура киинэ уонна оҕо саада тутулуннулар

Бөлөххө киир:

Балаҕан ыйын 13 күнүгэр Ю.А. Гагарин аатынан Култуура, аныгы инскусство киинэ уонна 203-с түөлбэҕэ баар “Сардаана” оҕо саада ааннарын тэлэйэ арыйыахтара. Үөрүүлээх арыйыыга Ил Дархан Айсен Николаев, “ВИС” тэрилтэ дириэктэрдэрин сэбиэтин чилиэнэ Сергей Ромашов кыттыыны ылыахтара.

edersaas.ru

Култуура, аныгы искусство саҥа уораҕайа 3 этээстээх, 5500 кв.м. иэннээх, Дьокуускай куорат култуурунай уонна дьыалабыай олоҕун биир сүрүн киинэ буолуохтаах. Манна 500 көрөөччүгэ анаммыт, аныгылыы тиэхиньиичэскэй хааччыллыылаах улахан киинэ саалата, киэҥ-куоҥ фойеҕа Саха сирин авиациятын мусуойа, элбэх дьайыылаах саала, айар мастарыскыайдар, кафе баар буолуохтара. Эбийиэк чааһынай-судаарыстыбаннай партнерство чэрчитинэн тутуллубут буолан, туох баар миэбэлинэн, анал тэриллэринэн хааччылынна, тэлгэһэтэ тупсаҕайдык оҥоһулунна.

Сардаана” оҕо саада 2 этээстээх, 4500 кв.м. иэннээх, 315 оҕо сылдьарыгар аналлаах. Саҥа дьиэ дьааһыланы, логопедическай бөлөҕү киллэрэн туран, барыта 18 бөлөххө анаммыт, онон ураты бырайыагынан тутуллубут. Киэҥ-куоҥ спортивнай, музыкальнай саалалар, оонньуур хостор, мэдиссиинэ кэбиниэттэрэ оҕо сүүрэригэр-көтөрүгэр, көҥүллүк сайдарыгар туһуламмыттар. Оҕо саадын тиэргэнигэр эмиэ оонньуур былаһааккалар бааллар. Бу саҥа, сайдыылаах түөлбэҕэ “ВИС” тэрилтэ “Айыы кыһата” гимназия, “Цветик-Семицветик” оҕо саадын дьиэлэрин эмиэ чааһынай-судаарыстыбаннай партнерство чэрчитинэн туппута.

Дьокуускайга биир кэмҥэ 12 култуура, үөрэх тэрилтэлэрин дьиэлэрэ тутуллан, оскуолаларга, оҕо саадтарыгар эбии 3000 миэстэ таһаарыллан, оҕо сайдарыгар бары усулуобуйа оҥоһуллар.

ВИС” тэрилтэ тутуулары болдьоҕор киллэрэн, өрөспүүбүлүкэ иннигэр ылыммыт эбээһэтэлистибэтин толордо. Чааһынай-судаарыстыбаннай партнерство тутуу хаачыстыбалаах буоларын мэктиэлиир, тутааччы сэттэ сылы быһа дьиэни тиэхиньиичэскэй өттүнэн көрөр-истэр, итэҕэһи туоратар.

Ангелина Васильева, “Саха сирэ” хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0