Култуура киэҥ эйгэтигэр норуот билиниитинэн бириэмийэлэр туттарылыннылар
2018-2019 сыл түмүгүнэн үлэтигэр-хамнаһыгар норуот билиниитин ылбыт дьоҥҥо «Грани культуры» бириэмийэни туттарыы үһүс төгүлүн ыытылынна.
Үөрүүлээх, долгутуулаах эҕэрдэлээһин Дьокуускайга А.С.Пушкин аатынан национальнай бибилэтиэкэ историяҕа саалатыгар буолла. Лауреаттары СӨ култууратын уонна искусствотын үлэһиттэрин айар сойуустарын бэрэссэдээтэлэ, Култуура уонна искусство кэллиэһин дириэктэрэ Захар Никитин эҕэрдэлээтэ, дохсун ытыс тыаһыгар доҕуһуоллатан бириэмийэлэри туттарда.
«Лучший фестиваль» анал аат кыайыылааҕынан «Стерх» классическай балет Бүтүн Арассыыйатааҕы бэстибээлэ ааттанна. Бириэмийэ СӨ искусствотын үтүөлээх диэйэтэлигэр Мария Сайдыкуловаҕа туттарылынна.
«Лучший творческий проект» анал аат лауреатынан СӨ народнай артыыһа, РФ үтүөлээх артыыһа Айталина Афанасьева (Адамова) «Я в музыке дарю свою любовь» үбүлүөйдээх кэнсиэрин иһин буолла.
«Прорыв года» анал аат «Тойон кыыл» уонна «Мин үрдүбэр күн хаһан да киирбэт» художественнай киинэлэр сүрүн дьоруойдара, Хаҥалас улууһун 2-с Дьөппөн сэлиэнньэтин народнай тыйаатырын артыыһыгар Степан Петровка туттарылынна.
«Бренд Якутии» лауреатын үрдүк аатыгар СӨ Бриллиантовай циркэтэ тигистэ. Бириэмийэ СӨ Судаарыстыбаннай циркэтин дириэктэригэр-художественнай салайааччытыгар, СӨ уонна РФ үтүөлээх артыыһыгар Сергей Расторгуевка туттарылынна.
«Лучший народный коллектив» лауреатынан Петр Решетников аатынан Чурапчытааҕы норуодунай тыйаатыр буолла. (Тыйаатыр режиссера СӨ култууратын үтүөлээх үлэһитэ Иван Бушков).
«Вдохновение» анал аат кыайыылааҕынан Мариинскай тыйаатыр опера эдэр ырыаһыттарын Академиятын солиһа Григорий Чернецов ааттанна.
«Лучший менеджер в сфере культуры» – Сунтаар улууһун култуураҕа управлениетын начаалынньыга, СӨ култууратын туйгуна Мария Кобельянова-Тускулаана.
«Лучший молодежный проект» – «Автобус радости» ыччат-подростковай киинэ (художественнай салайааччы, СӨ үөрэҕириитин туйгуна Марина Степанова).
«Лучший массовый праздник» бастыҥынан Аммаҕа ыытыллыбыт СӨ норуоттарын VII спортивнай оонньууларын арыллыытын уонна сабыллыытын церемонията ааттанна.
«Творческая семья» аата СӨ норуодунай артыыстарыгар Екатерина уонна Алексей Егоровтарга тигистэ.
«Лучший в сфере библиотечного дела» быйылгы кыайыылааҕынан СӨ национальнай бибилэтиэкэтин иһитиннэрэр үлэтин тэрийэр киин сэбиэдиссэйэ Светлана Попова таҕыста.
«Лучшее освещение культуры в СМИ» аата суруналыыс Иван Барковка туттарылынна.
«Меценат года» аатын СӨ норуодунай дьокутаата, урбаанньыт Руслан Федотов ылла.
«За преданность искусству» номинация кыайыылааҕынан А.С.Пушкин аатынан нуучча судаарыстабыннай академическай драматическай тыйаатырын толорооччу дириэктэрэ Александра Звонкова буолла.
«Грани культуры» сыл ахсын туттарар саамай үрдүкү бириэмийэтэ — «Народное признание» бочуоттаах аат поэт, суруналыыс, «Саха» НКИХ эрэдээктэригэр Наталья Михалева-Сайаҕа туттарылынна.
Кыһамньылаах үлэлэрин, култуура, искусство эйгэтигэр ситиһиилэрин иһин Бочуотунай грамоталарынан Муусука үрдүкү оскуолатын профессора Станислав Афанасенко, СӨ композитордарын Сойууһун бэрэссэдээтэлин солбуйааччы Татьяна Борисова-Павлова, «Саха» НКИХ эфиргэ биэрии Дирекциятын художественнай-туруорар отделын начаалынньыга Лидия Васильева, мелодист уонна ааптар-толорооччу Владимир Индигирскэй, Суорун Омоллоон аатынан опера уонна балет судаарыстыбаннай тыйаатырын солиһа Григорий Петров наҕараадаланнылар.
Култуура киэҥ эйгэтигэр норуот билиниитинэн туттарыллар анал ааттар ахсааннара быйыл 12-ттэн 15-кэ диэри элбээтэ.
Санатар буоллахха, «Грани культуры» уопсастыба билиниитинэн туттарыллар бириэмийэни СӨ култууратын уонна искусствотын үлэһиттэрин айар сойууһа 2016 сыллаахха олохтообута. Бу бириэмийэни туттарыы үһүс төгүлүн ыытылынна. Бириэмийэни туттарыыны быһаарар сэбиэккэ киирэр эспиэрдэр өрөспүүбүлүкэҕэ сыл устатыгар ыытыллар култуурунай олох бары хайысхатын барытын хабан, болҕойон ырытан, сыаналаан киэҥник көрөллөр. Итинтэн кинилэр култуура эйгэтин үлэтигэр биллибит-көстүбүт, дуорааннаммыт, далааһыннаах тэрээһиннэри быһаараллар. Кыайыылаахтары анал хамыыһыйа быһаарар.