Култуура кэллиэһин устудьуона WorldSkills Russia-2020 наҕараадатын тутта

Ааптар: Эдэр Саас

Бөлөххө киир:

Дьокуускайдааҕы култуура кэллиэһин устудьуона Сергей Андреев WorldSkills Russia-2020 наҕараадатын тутта.

Бу туһунан кэллиэс пресс-киинэ иһитиннэрэр. А.Д.Макарова аатынан Дьокуускайдааҕы култуура уонна ускуустуба кэллиэһигэр «Музыкальное звукооператорское мастерство» идэҕэ үөрэнэр Сергей Андреев медальонунан наҕараадаланна. Кини «WorldSkills Russia-2020» национальнай чөмпүйэнээт түмүгэр киирэн, «Звукорежиссура» компетенцияҕа ситиһиилэннэ диэн суруйаллар.

Быйыл чөмпүйэнээт түмүктүүр күрэхтэһиитэ дистанционнай көрүҥүнэн, балаҕан ыйын 6-21 күннэригэр, ыытыллыбыт. Дьокуускайдааҕы култуура кэллиэһэ «Фотография» уонна «Звукорежиссура» компетенцияларга «Юниордар» уонна «Эдэр профессионаллар» категорияларга кыттыбыт.

Ол түмүгэр, «Звукорежиссура» хайысхаҕа 3 куурус устудьуона Сергей Андреев (салайааччы-преподаватель С.П. Олесов) ситиһиилээхтик кыттан, наҕараадаламмыт. Күрэскэ кыттааччыны бэлэмнээбит преподаватель Ренат Максутов «WorldSkills Russia-2020» национальнай чөмпүйэнээт түмүгэр экспертнэй сэбиэккэ чилиэнинэн үлэлээбит. Чөмпүйэнээккэ оҕолору бэлэмнээһиҥҥэ Ренат Витальевич улахан кыһамньытын уурар буолан, биһиги кэллиэспит бу улахан күрэскэ иккис төгүлүн ситиһиилэннэ диэн махтанан, киэн туттан этэллэр.

Наҕараадаламмыт устудьуон үрдүк таһымнаах күөн күрэскэ кыттыы улахан үөрүйэҕи биэрэрин бэлиэтээбит. Бу күрэскэ «Юниордар» категорияларыгар кыттыбыт Андриан Иванов (Үөһээ Бүлүү, М.А.Алексеев аатынан лиссиэй үөрэнээччитэ) үрүҥ көмүс наҕараадаҕа тиксибит.

Салайааччы И.А.Алексеева: «Бу сыралаах үлэ уонна кыайыыга дьулуур түмүгэ. Биһиги дьоҕурдаах устудьуоннарбытынан уонна выпускниктарбытынан киэн туттабыт. Кинилэргэ ситиһиилэри баҕарабыт», — диэн истиҥ эҕэрдэтин тиэрдибит.

2016 сыллаахха Денис Петров Красногорскай куоракка «Молодые профессионалы» чөмпүйэнээккэ (World Skills Russia) «Видеопроизводство» хайысхаҕа үрүҥ көмүс наҕарааданы ылары (2 миэстэ) ситиспит. 2019 сыллаахха Кирилл Васильев Казань куоракка (Татарстан) «Молодые профессионалы» VII национальнай чөмпүйэнээт финалыгар, «Звукорежиссураҕа» боруонса призерунан буолбут (3 миэстэ).