Бу күннэргэ СӨ култууратын үтүөлээх үлэһитэ Яна Игнатьева култуура эйгэтигэр үлэлээбитэ 45 үбүлүөйдээх сылын бэлиэтиир.
edersaas.ru
Сатабыллаах салайааччы быһыытынан Яна Игнатьева Өксөкүлээх Өлөксөй аатынан Норуоттар доҕордоһууларын дьиэтин норуоттар доҕордоһууларын уйатынан оҥорбут улахан үтүөлээх.
Норуот маастардарын өрөспүүбүлүкэтээҕи хамсааһынын маассабай оҥорон, киэҥ араҥаҕа таһааран, үрдүк таһымнаах оҥорорго үлэлэспитэ. Ол түмүгэр «Якутия мастеровая» тэрээһин Саха сирин олохтоохторун түмпүтэ.
Ил Дархан Ыйааҕынан, 2012 сылтан саҕалаан, кулун тутар 5 күнүгэр Саха сирин норуоттарын уус-уран оҥоһуктарын, искусстволарын араҥаччылыыр, сөргүтэр уонна сайыннарар сыаллаах, Норуот маастарын күнэ сыл аайы далааһыннаахтык бэлиэтэнэн, таһыма өссө үрдээн иһэр.
Саха таҥаһын кэтэн сэлэлээн хаамыы саха дьонун түмэр уонна сомоҕолуур оруолланна. Ол курдук, оннооҕор хоту улуустар уонна промышленнай оройуоннар бэрэстэбиитэллэрэ айан ырааҕын аахсыбакка, кыттыыны ылаллара — саха таҥаһын оруола үрдээбитин биир чаҕылхай көстүүтэ.
Бу далааһыннаах үлэ барыта — култуура үтүөлээх үлэһитэ Яна Игнатьева үлэтин биир өрүтэ.
Култуура эйгэтигэр 45 сылынан айар куттаах Яна Игнатьеваны истиҥник эҕэрдэлиибит!
Яна Викторовна бары санаабыт санаата, толкуйа кэмигэр олоххо киирэн иһэригэр баҕарабыт.
Елена ПОТОЦКАЯ, «Саха сирэ» хаһыат. edersaas.ru
Хаартыска — интэриниэттэн.