“Култуураҕа уонна искусствоҕа туһаайыллар өйөбүл миэрэлэр суолталаахтар”
СӨ Ил Дархана Айсен Николаев Ил Түмэҥҥэ Анал этиитигэр култуураҕа, духуобунаска өрөспүүбүлүкэ болҕомто уурарын биллэрдэ. Саха сирин олохтоохторо бүгүн Анал этиини киэҥник ырыталлар.
Живописец-худуоһунньук Мира Аргунова санаатын бу курдук үллэстэр:
— Саха бэлиитикэтин култууратыгар үтүө үгэһинэн буолбут СӨ Ил Дархана Айсен Сергеевич Николаев этиитин болҕойон, интэриэһиргээн иһиттим. Ил Дархан ордук сытыы боппуруостарга болҕомто ууран, социальнай тиэмэлэри барытын кэриэтэ таарыйда.
Бастатан туран, норуотун доруобуйатын уонна этэҥҥэ буолууларын туһугар кыһамньытын иһин Айсен Сергеевичка махтанабын. Бу хайысхаҕа барбыт сүҥкэн үлэ – лабораториялар ахсааннара уонна балыыһаларга миэстэ хас даҕаны бүк эбиллибитэ өйдөнөн хаалымыан сатаммат.
Биһиги лидербититтэн инникибит үтүө буоларыгар эрэннэрэр итэҕэтиилээх этиилэри иһиттибит. Тус бэйэм, Ил Дархан Анал этиитэ, өрөспүүбүлүкэ бары тэрилтэлэрин үлэтин көдьүүһүн үрдэтиэ дии саныыбын.
Искусство эйгэтигэр үлэлиир сойуустар бэрэстэбиитэллэрэ буоларым быһыытынан, култуураҕа уонна искусствоҕа туһаайыллар өйөбүл миэрэлэр суолталаахтар.
Кини Саха сирэ искусство сайдыытыгар креативнай кластерга кубулуойуоҕа диэн бэлиэтээтэ. Мин манна итэҕэбин. Тоҕо диэтэххэ, өрөспүүбүлүкэҕэ ойуулуур-дьүһүннүүр искусство чэчирии сайдара харахха быраҕыллар. Кэллиэгэлэрим өрөспүүбүлүкэ тас өттүгэр ыытыллар куонкурустарга уонна быыстапкаларга ситиһиилээхтик кыттан, бириистээх миэстэлэри ылаллар.
Төһө даҕаны пандемия кэмэ ааҥнаатар, мин Владивостокка, Делавэрга, Лондоҥҥа ыытыллыбыт норуоттар икки ардыларынааҕы уонна эрэгийиэннээҕи быыстапкаларга кыттынным. Норуоттар икки ардыларынааҕы мэтириэттэр уонна Делавэрга фигуративнай искусствоҕа онлайн-быыстапкаҕа турбут “Сокровище Арктики” хартыынам куонкурус кыайыылааҕын дипломунан бэлиэтэннэ.
Айсен Сергеевич Саха Өрөспүүбүлүкэтигэр култуура, билим уонна үөрэх ситимин олохтуур суолталааҕын бэлиэтиир. Манна биһиги үөрэхпит кыһата — Арктикатааҕы култуура уонна искусство судаарыстыбаннай института өрөспүүбүлүкэ салалтатыттан чахчы өйөбүлү ылар. Бу ыйга норуоттар икки ардыларынааҕы үс тэрээһини – култуура виртуальнай далаһатын, кэмпириэнсийэни уонна биэс дойду кыттыылаах уус-уран быыстапканы тэрийдибит. Мин манна иккис куратор быһыытынан кытынным.
Бэйэм холобурбун эттэххэ, “Министр” дьыалабыай өрөспүүбүлүкэтээҕи оонньуу түмүгүнэн, Ил Дархан тус илиититтэн кыайыылаах дипломун ылан турабын.
СӨ Ил Дархана Айсен Сергеевич Николаев өйөбүлүнэн, Саха сирэ аны даҕаны хотугу норуоттар култуураларын биһигинэн буоларыгар эрэнэбин.
“Саха сирэ” хаһыат, edersaas.ru