Култуура

Култуураҕа 33 бырайыак бэрэсидьиэн гранын ылла

РФ бэрэсидьиэнин култуурунай көҕүлээһиннэри өйүүр пуондатын гранын куонкуруһугар Саха сириттэн быйыл хаһааҥҥытааҕар элбэх сайаапка бэриллибит. Култуура, духуобунай сайдыы миниистирэ Юрий Куприянов эппитинэн, 8 көрүҥүнэн 236 сайаапканы биэрбиттэр.

Улуустарынан ылан көрдөххө, саамай элбэх, 12 сайаапканы Мэҥэ Хаҥалас, 11 – Кэбээйи уонна Алдан, 10 – Бүлүү улууһа биэрбиттэр. Саха сириттэн 33 бырайыак 34,8 мөлүйүөн суумалаах граны ылар кыахтанна.

Арассыыйа үрдүнэн куонкурус олус үрдүк – балтараа ый иһигэр 83 эрэгийиэнтэн 12 460 сайаапка киирбит.

Саха сирин музыкальнай диэйэтэллэрин сойууһун “Музыка и Слово. Аудиокниги для слепых и слабовидящих” бырайыага кыайан, 984 377 солкуобайы ылбыт. Маны тэҥэ, 215 600 солкуобайы бэйэлэрэ булбуттар, онон үбүлээһин уопсай суумата 1 199 977 солкуобайга тэҥнэспит.

— Биһиги сойууспут хас да култуура тэрилтэтин түмэр. Бырайыак идиэйэтин Саха сирин филармониятын үлэһиттэрэ биэрбиттэрэ, кинилэр Көрбөт уонна мөлтөхтүк көрөр дьон бибилэтиэкэлэрин кытары уруккуттан бииргэ үлэлииллэр. Бу бибилэтиэкэ 130 тыһыынча кинигэлээх, онтон 80%-на анал көрүҥнээх. Сыллата 60 аудиокинигэни таһаараллар, ол былдьаһык буолар. Сүрүннээн сахалыы тылынан кинигэлэр тахсаллар, музыканан доҕуһуоллааһын суох.

Онон аан бастаан аудиокинигэ эрэ буолбакка, литературнай-музыкальнай композициялар бэлэмнэнэн тахсыахтара. Тыйаатыр артыыстара Татьяна Легантьева, Степан Федоренко тиэкиһи ааҕыахтара, филармония артыыстара муусуканан доҕуһуоллуохтара.

Бырайыак чэрчитинэн, А.С. Пушкин “Метель” сэһэнэ (Г. Свиридов муусукатынан), “Поэты Серебряного века” хоммурунньук, “Арктические новеллы” хоһоон, кэпсээн аудиокинигэлэрэ тахсыахтара, — диэн сойуус бэрэссэдээтэлэ Наталья Базалева кэпсээтэ.

Ангелина Васильева, “Саха сирэ” хаһыат, edersaas.ru

Хаартыска: sakha.gov.ru

0
0
Telegram @edersaas20