Нам улууһун олохтоохторо өр сылларга туруорсубут боппуруостара — аныгылыы бырайыактаах элбэх функциялаах Култуура киинэ, дьэ, олоххо киирэр буолла.
Ол курдук, Өрөспүүбүлүкэ күнэ Нам улууһун олохтоохторугар биир умнуллубат өрөгөйдөөх күнүнэн буолла. Бу күн Култуура киинин бастакы тирэх сыбаайата түстэ.
Бу үөрүүлээх сонун туһунан улуустааҕы Култуура управлениетын кылаабынай режиссера Иван Новиков санаатын үллэстэр:
— Афанасий Шестаков аатынан мас кулууп дьиэтэ — 1956 сыллааҕы тутуу. Бу тэрилтэ дьиэтэ олус эргэрэн, хаарбах туруктаах. 2008-2012 сылларга Альберт Ильин улуус баһылыгынан олордоҕуна, култуура үлэһиттэрэ саҥа таас Култуура киинэ наада диэн күүскэ туруорсубуппут. Киин сиргэ олорор эрээри Таатта, Чурапчы, Ньурба улуустарын курдук Култуура дыбарыаһын тутар кэм кэллэ диэн. Онно, биллэн турар, үп кырыымчык буолан, култуура үлэһиттэрэ, уопсастыбаннай тэрилтэлэр, түмсүүлэр, быһата бары турунан култуура марафоннарын тэрийэн, кэнсиэрдээн, быыстапкалаан мөлүйүөн курдук үбү хомуйбуппут. Оччолорго мин Култуура управлениетын салайааччыта этим. Онтон баһылыгынан Александр Атласов талыллан, Култуура управлениетын салайааччыта Елена Заровняеваны, Ленскэй сэлиэнньэтин баһылыга Андрей Новгородовы кытта олохтоохтук үлэлэһэн, Култуура киинин бырайыагын оҥорбуттара. 2019 сылтан улуус баһылыгынан талыллан баран, Юрий Слепцов Олоҥхо Ыһыаҕа ыытыллар кэмигэр анаан туруорсубута. Кини Нам улууһа кэлэр биэс сылга өрөспүүбүлүкэ устуоруйатыгар суолталаах үбүлүөйдэр буолаары туралларын бэлиэтээбитэ. Ол курдук, 2022 сылга Саха АССР төрүттэммитэ — 100, судаарыстыбаннай уонна бэлитиичэскэй диэйэтэл Максим Аммосов — 125, 2021 сылга судаарыстыбаннай уонна сэбиэскэй-партийнай диэйэтэл Илья Винокуров 125 үбүлүөйдээх сылларын көрсө Култуура дыбарыаһа Духуобунас киинин быһыытынан тутуллара наадатыгар туруорсубута. Онон биһиги, Нам улууһун олохтоохторо, 2022 сылга үөрүүлээх үбүлүөйдээх тэрээһиннэри саҥа таас Култуура дыбарыаһыгар бэлиэтииргэ эрэллээхпит.
Улуустааҕы пресс-киин иһитиннэрэринэн, саҥа тутуллуохтаах 450 миэстэлээх, 5692,06 кв.м. иэнннээх, үс мэндиэмэннээх Култуура киинэ судаарыстыбаннай уонна бэлитиичэскэй диэйэтэл Максим Аммосов болуоссатын утары тутуллуоҕа. Бырайыагы «Якутагропромпроект» ХЭТ оҥордо. Онтон дыбарыаһы тутууга «РДР Групп» диэн ХЭУо ылсан үлэлэһиэҕэ.
Тутууну «Үүнэр көлүөнэ» тус сыаллаах пуондата үбүлүүр. Бу сааскыттан үлэ ыытыллан бардаҕына, икки сылынан үлэҕэ киириэҕэ.
Аныгылыы бырайыактаах култуура дыбарыаһыгар Афанасий Шестаков аатынан Норуот айымньытын дьиэтэ, Намнааҕы кииннэмит библиотечнай ситим, Намнааҕы ЗАГС управлениета, СӨ Национальнай художественнай музейын хартыына галереята, Петр Сивцев аатынан Намнааҕы история уонна этнография түмэлэ, култуура уонна духуобунас сайдыытын управлениета киириэхтэрэ.
Елена ПОТОЦКАЯ, «Саха сирэ» хаһыат, edersaas.ru
Хаартыска — «Нам улууһа» МТ пресс-киинэ.