СӨ Айылҕа харыстабылын министиэристибэтин ыытар үлэтин биир көрүҥүнэн айылҕа кыылларын аһатыы буолар.
edersaas.ru
Ол иһин аҕыйах хонуктааҕыта Амма улууһугар кулааһайдарга анаан от тиэйдилэр. Дьэ, бу бэртээхэй хамсааһыны улуус айылҕа харыстабылын иниспиэксийэтэ көҕүлээн, ойуур хаһаайыстыбата, булчуттар уонна балыксыттар түмсүүлэрэ бэрт көхтөөхтүк кытыннылар. Ити түмүгэр 4 массыынанан 6 рулон оту Күлүпчү учаастагар тиэйэн таһаардылар.
— Биһиги сылга иккитэ маннык тэрээһиннэри ыытабыт. Булчуттарбыт кыттыһан, от булан, көмөлөстүлэр. Онон Күлүпчүгэ ол тиэйбит оппутун тарҕаттыбыт. Аны иккис учаастакпыт Морхой диэн. Онно бурдук, туус ыһааччыбыт. Бу Күлүпчү уонна Морхой диэн кыыл-сүөл ууһаан-тэнийэн, тарҕанарыгар анаммыт учаастактар 2015 сыллаахха Ил Дархан Ыйааҕар олоҕуран тэриллибиттэрэ. Рулон оттору таһаараммыт кыылларбыт тыйыс тымныылаах кыһыммытын этэҥҥэ туораан, эһиил төрөөн-ууһаан элбииллэрин туһугар, эбии аһатыы үлэтин ыыттыбыт. Бу тэрээһиммит үрдүк таһымнаахтык ааһарыгар туора турбакка, күүс-көмө буолбут дьоммутугар Николай Владимирович Акимовка, Александр Андреевич Гаврильевка, Прокопий Валерьевич Заборовскайга, Иван Васильевич Заровняевка, Максим Сергеевич Кулевка, Иван Степанович Слепцовка уонна “Амма” АУо дириэктэригэр Роман Сергеевич Спасьевка тус бэйэм ааппыттан дириҥ махталбын тиэрдэбин. Инникитин даҕаны маннык тэрээһиннэри үтүө үгэскэ кубулутан, сылын аайы ыытыаҕыҥ диэн бука бары кэпсэттибит. Сылтан сыл кыттыһыан баҕалаах булчуттарбыт элбээн, үксээн иһиэхтэрэ диэн бүк эрэнэбит уонна ыҥырабыт, — диэн кэпсээтэ уонна махтанна Амма улууһунааҕы айылҕа харыстабылын иниспиэксийэтин начаалынньыга Семен Заровняев.
Онон аммалар айылҕа кыыллара этэҥҥэ кыстыылларын туһугар бэркэ тэриннилэр. Санатан эттэххэ, соторутааҕыта “Сонор суола” балаһабытыгар кыыллары аһатар тэрээһиннэргэ кыттыҥ диэн эмиэ суруйан турабыт.
Женни Стрюкова, edersaas.ru
Хаартыскалары Амма улууһун айылҕа харыстабылын иниспиэксийэтэ биэрдэ[vc_single_image image=»145249″ img_size=»medium»][vc_single_image image=»145250″ img_size=»medium»][vc_single_image image=»145248″ img_size=»medium»][vc_single_image image=»145247″ img_size=»medium»]