Саха омук төрүт култууратыгар олоҕурбут үгэс эргиирин тутуһан, сааскы куйуур кэмин олоҥхотун сөргүтэр, үүнэр сүһүөх ыччат олоҥхо тыынын, өйүн, тылын-өһүн, ырыатын төрүт үгэһин иҥэринэн, саха көҥүл айыы киһитэ буола үүнэригэр олук уурар сыаллаах-соруктаах «Куйуур олоҥхото-2021» олоҥхо толорооччулар күөн күрэстэрэ эдэрдэргэ буолан ааста.
Дьаҥ тарҕаныытын хааччахтааһын чэрчитинэн, тэрээһин куйаар ситимигэр ыытылынна. «Куйуур олоҥхото-2021» күөн күрэһи Өрөспүүбүлүкэтээҕи «Ыччат олоҥхоһут» уопсастыбаннай түмсүү, Өрөспүүбүлүкэтээҕи «Олоҥхо Ассоциацията», «Олоҥхо Тыйаатыра» СӨ АТ, М.К. Аммосов аатынан Хотугулуу-Илиҥҥи федеральнай университет, Олоҥхо научнай-чинчийэр үнүстүүтэ, ХИНТуоКИ Культурология кафедрата тэрийэн ыыттылар. Быйылгы күөн күрэскэ Таатта, Чурапчы, Амма, Нам, Бүлүү, Сунтаар улуустарыттан уонна Дьокуускай куораттан уопсайа 11 ыччат кытынна. Дьүүллүүр сүбэ быһаарыытынан Кылаан ааты – П.П.Ядрихинскай-Бэдьээлэ «Дьырыбына Дьырылыатта» олоҥхотун толорбут Намтан сылдьар Яна Нюргусова ылла. Кини бырайыак ааптара, дьүүллүүр сүбэ бэрэссэдээтэлэ Г.С. Попова – Санаайа анал бирииһин тутта.
I үрдэли уонна Е.Н. Протодьяконова, У.М.Флегонтова туруорбут анал бириистэрин Александра Яковлева (Сунтаар), II үрдэли уонна Олоҥхо тыйаатырын анал бирииһин – Анастасия Алексеева (Чурапчы), III үрдэли уонна «Ыччат олоҥхоһут» түмсүү анал бирииһин – Сайаана Попова (Чурапчы) ыллылар. Ону таһынан «Сэһэн төрдүн тутар олоҥхоһут» анал аат – Александр Ефремов (Амма),«Кэскиллээх олоҥхоһут» анал аат – Афанасий Собакин (Таатта),«Кылыһах ырыалаах олоҥхоһут» анал аат – Ньургустана Лебедева (Нам),«Дорҕоон тойуктаах олоҥхоһут» анал аат – Дайаана Егорова (Чурапчы) уонна «Удьуор утумун тутар олоҥхоһут» анал аат – Анна Черкашина (Бүлүү) буоллулар.
Киирбит үлэлэр Олоҥхо научнай-чинчийэр институтун архыыбыгар туттарыллыахтара, институт сыыппаранан архыыбыгар сыһыарыллан, куйаар ситимигэр үйэтитиллиэхтэрэ.