Куйаар ситиминэн ыытыллыбыт отчуот Тымныы полюһун үгүс сытыы боппуруоһун таарыйда
Олунньу 24 күнүгэр өрөспүүбүлүкэ ситэриилээх былааһын отчуота Өймөкөөн улууһугар куйаар ситиминэн буолла.
Отчуоту улуус олоҕун-дьаһаҕын кытта ситимнээн СӨ тырааныспар уонна суол хаһаайыстыбатын миниистирэ Владимир Сивцев билиһиннэрдэ.
ВКС эрэсииминэн ыытыллыбыт тэрэһиҥҥэ оробуочай командировкаҕа сылдьан, киин куораттан улуус баһылыга Иннокентий Сивцев, улуустааҕы киин балыыһа кылаабынай бырааһа Ираида Харлампьева, “Тымныы полюһа Өймөкөөн” МТ баһылыга Павел Васильев, “Сордоҥноох нэһилиэгэ” МТ баһылыга Иван Максимов кыттыыны ыллылар.
Улуус баһылыга Иннокентий Сивцев бэлиэтээбитинэн, отчуокка 80 суолталаах ыйытыы киирдэ: Уус-Ньараттан – 15, Томтортон – 12, Төрүттэн – 10, Өймөкөөнтөн – 9, Сордоҥноохтон – 9, Аартыктан – 6, Үчүгэйтэн – 5, улуус олохтоохторуттан – 14.
— Уус-Ньара бөһүөлэгин уонна нэһилиэктэр баһылыктара суолталаах тэрээһиҥҥэ көхтөөхтүк кытыннылар. Отчуокка бэйэни салайыныы бэрэстэбиитэллээх уорганнарын дьокутааттара эмиэ кыттан, үрдүкү салалта хоруйдарын кытта билсэн, быйылгы сыллааҕы үлэлэригэр төһүү өйөбүлүнэн буолара саарбаҕа суох, — диэн кэпсиир улуус муниципалитетын баһылыга Иннокентий Сивцев.
Куйаар ситиминэн барбыт толорор былаас отчуотун Томтор нэһилиэгин баһылыга Никифор Протопопов олус сэргээбитин биллэрдэ:
— Бастатан туран, өрөспүүбүлүкэ бүддьүөтүгэр үрдүкү былаас салалтата улуустарынан айанныырыгар улахан кэмчилээһин буоллаҕа. Иккиһинэн, дьокутааттарбын кытта бары бииргэ отчуоту көрө-истэ олордубут. Үсүһүнэн, ыаллыы нэһилиэктэр тугу туруорсаллара, онно үрдүкү салалта хоруйдуура, туһугар уопут атастаһыыта буоллаҕа. Биир тылынан, бэйэни салайыныы уорганнара уонна толорор былаас утары көрсөн, баар кыһалҕаны туоратыыга уопсай сүбэ мунньах курдук буолла. Олохтоохтортон ким баҕалаах куйаар нөҥүө барытын истэ-билэ олордулар. Онон маннык мунньах үс өрүккэ — улууска олорор салайааччыга да, үрдүкү былаас уорганыгар да, ыраахтан көрө-истэ олорор тыа сирин олохтооҕор да, туһалааҕа чахчы.
Отчуокка министиэристибэлэр уонна биэдэмэстибэлэр салайааччылара уонна эппиэттээх бэрэстэбиитэллэрэ Өймөкөөн улууһугар сыһыаннаах олох-дьаһах бары боппуруостарыгар тустаах хоруйу биэрдилэр.
Елена ПОТОЦКАЯ, «Саха сирэ» хаһыат, edersaas.ru