Хотугу норуоттар астарын-үөллэрин бэлэмнээһин туһунан куйаар ситиминэн кинигэ тахсара былааннанар. Бу туһунан А.Е.Кулаковскай аатынан норуоттар доҕордоһууларын дьиэтин пресс-сулууспата иһитиннэрдэ.
Эбэҕэ муус уһунна, мутукча минньигэс сыта дыргыйда, кэрии тыаҕа кэҕэ этэн чоргуйда. Күн уота чаҕылыччы тыкта, маанылаах айылҕа барахсан уһугунна, күөх киистэтин иилиннэ, чыычаахтар көй салгыҥҥа күөрэйэ көттүлэр, дьырыбынаһа ыллаатылар, тугутчааннар төрөөтүлэр, ойуоккалаһан сүүрдүлэр. Көрүҥ эрэ сөҕө, хайгыы, тулабытыгар хайдахтаах кэрэний!
Бу сөҕүмэр кэрэ хоту дойду олохтоохторугар үөрүүнү-көтүүнү саҥалыы сахта. Хоту сир хоһуун дьонугар саҥа сыл саҕаланна,ону кытары тэбис-тэҥҥэ хаһаайыстыбаҕа үлэ-хамнас үксээтэ. Маныаха былыр-былыргыттан сиэр-туом ыытыллар үтүө үгэстээҕэ. Ол билигин, аныгы үйэҕэ, улахан бырааһынньык курдук ыытыллар буолбута кэрэхсэбиллээх. Оттон бырааһынньыкка хайаатар да амтаннаах, иҥэмтиэлээх сибиэһэй этинэн, айылҕа барахсан бэрсибит маанылаах аһынан күндүлүүллэр.
Хотугу төрүт олохтоох аҕыйах ахсааннаах норуоттар бырааһынньыктарын — Айанңа мяланни, Туундара тыллыыта, Бакалдын, Эвинэк, Кильвэй, Шахадьибэ, Хэйро, Первой путины, Туймаада ыһыаҕа, о.д.а. бырааһынньыктары көрсө А.Е. Кулаковскай аатынан норуоттар доҕордоһууларын дьиэтэ уонна СӨ Хотугу төрүт олохтоох аҕыйах ахсааннаах норуоттар Ассоциациялара СӨ Тас сибээскэ уонна норуоттар дьыалаларыгар министиэристибэ өйөбүлүнэн «Виртуальная кулинарная книга народов Севера «Рецепты наших бабушек» бырайыагы саҕалаатылар.
Бырайыакка кыттыы усулуобуйата:
Сэҥээрбиттэр, сэргээбиттэр culcentr_kmns@mail.ru электроннай аадырыска КУЛИНАРНАЯ_КНИГА диэн бэлиэтээн суруйаҕыт. Суруйар ырысыапкытыгар туох туманы туттаргытын, бүлүүдэни бэлэмнээһин бэрээдэгин, ону сэргэ, кыттааччы туһунан иһитиннэриини (аата, аҕатын аата, араспаанньата, нэһилиэгэ, улууһа) уонна бу ырысыапкытын хантан ылбыккыт туһунан толору, сиһилии быһааран суруйаҕыт. Хаартыскалардаах буолара уонна бүлүүдэни видеоҕа устан ыытыы кэрэхсэнэр.
Ырысыаптары 2020 сыл бэс ыйын 15 күнүгэр диэри ыытаҕыт.
Матырыйаалларын ыыппыт кыттааччы «инстаграм» тиһигэр @ddn_kulakovskogo, @kmns_ddn_kulakovskogo аккауннарга, ddn.ykt.ru сайтка, А.Е.Кулаковскай аатынан норуоттар доҕордоһууларын дьиэтин ютуб-ханаалыгар уонна кинигэ бэчээттэнэн тахсарыгар сөбүлэҥин биэрэр.
Бэриллибит матырыйааллар төннөрүллүбэттэр. Бырайыакка кыттыы босхо.
Матырыйаалы бэчээттээн таһаарыыга ааптар аатыгар хайаан да ссылка оҥоһуллар. Бырайыакка кыттыбыт киһиэхэ 1 экземпляр бэчээттэнэн тахсыбыт матырыйаал туттарыллар.
Кординатордар төлөпүөннэрэ: Охлопкова Ольга Петровна — 89841101236, Куличкина Анастасия Еремеевна – 89644186725.