Коронавирус дьаҥа оҕолор сайыҥҥы сынньалаҥнарыгар быйыл уларытыылары киллэрдэ.
Сунтаарга, Б.Н.Андреев аатынан Элгээйитээҕи региональнай түмэл экологическай киинигэр (Айылҕа түмэлэ), оҕолор куйаар ситиминэн куруһуокка дьарыктаналлар. Тулалыыр эйгэни үөрэтэллэр, билиилэрин-көрүүлэрин хаҥаталлар. Бу туһунан сиһилии СӨ Экология министиэристибэтин саайтыгар билсиэххитин сөп.
Быһа тардан сырдаттахха, педагогтар бэс ыйын 1 күнүттэн дистанционнай ньыманан «Эдэр экологтар», «Айылҕа знатоктара» куруһуоктарга дьарыктарын саҕалаабыттар. Манна өрөспүүбүлүкэ улуустарыттан оскуола үөрэнээччилэрэ дьарыктаналлар. Оҕолор кыыл-сүөл, көтөр-сүүрэр, үүнээйи арааһын, тулалыыр эйгэ туһунан билиилэрин-көрүүлэрин хаҥаталлар, сөбүлүүр, сэҥээрэр хайысхаларын дириҥэтэн үөрэтэллэр. Ону сэргэ, куйаар ситиминэн ыытыллар викториналарга кытталлар, ыйытыыларга хоруйдууллар, гербарий хомуйаллар, анал дневниктэригэр тугу үөрэппиттэрин бэлиэтэнэллэр, уруһуйдууллар.
Оҕолор сэргииллэрэ-сэҥээрэллэрэ элбэх, барыга көхтөөхтүк кытталлар диэн бэлиэтииллэр. Итинэн буоллаҕына, сайыннарын туһалаахтык атаараллар.
+1
+1
+1
+1
+1
+1
+1