Сүрүн Уопсастыба

«Куйаар-куодунан» киирэр миэстэлэр каарталара баар буолла

Арассыыйа эрэгийиэннэригэр уопсастыбаннай сирдэргэ QR-куодунан киирии систиэмэтэ былааннаахтык үлэлиир. Саха сиригэр сэтинньи 8 күнүттэн атыы-эргиэн кииннэригэр куодунан киирэр буолуохпут. Хайдах куод ханнык сиргэ ирдэнэрин туһунан стопкоронавирус.рф порталга баар каартаҕа көрүөххэ сөп.

«Эрэгийиэн аайы ылыныллыбыт миэрэлэр уратылаһыахтарын сөп. Олохтоохтор олорор сирдэригэр ханнык миэрэлэр төһө болдьоххо ылыныллыбыттарын туһунан информацияны билэллэрин туһуттан, маны барытын биир порталга түмтүбүт», — диэн «Диалог Регионы» тэрилтэ генеральнай дириэктэрин бастакы солбуйааччы Кирилл Истомин эттэ.

Стопкоронвирус.рф порталга баар эпидемиологическай балаһыанньа каартатын ый устата түөрт  мөлүйүөн киһи киирэн көрөр. Туох уларыйыы баарынан порталы саҥардаллар.

«Хомойуох иһин, порталга баар каартаҕа Саха сиригэр кыһыл өҥ элбэх. Ол аата ыарыы элбэҕин бэлиэтиир. Маннык тарҕамматын туһуттан дьон хантаагын аҕыйатыахтаах. Онуоха QR-куод систиэмэтэ гражданнар көхтөрүн бэрээдэктиэҕэ», — диэн Саха сиринээҕи ЦУР салайааччыта Василий Десяткин иһитиннэрэр.


«Куйаар-куоду» (QR-куоду) «Госуслугалар» саайтарыттан ылыахха сөп. Ол туһуттан «личнай кабинекка» киирэн, менюга баар «Здоровье» салааны, салгыы «Дневник самонаблюдений и сертификат вакцинации COVID-19» эбэтэр «Сертификат переболевшего» диэни баттааҥ.

Хаартыска — РБК.

0
0