Ийэ сылынан төрөппүт буоларга бэлэмнэнэр эдэр дьоҥҥо анаан QR-куодтаах дьоҕус кинигэни таһаарыахтара. Манна оҕо төрөтөргө былааннааһын, иитии-харайыы боппуруостарыгар хоруйдардаах, туһалаах информация баар.
Холобур, ханнык балыыһаҕа, ханнык бырааска баран көрдөрүөххэ сөбүн, экстракорпоральнай буоһатыы (ЭКО), хат буолуу, битэмииннэри иһии, ийэ буолуохтаах кыыс доруобуйатын көрүнүүтүн, ыарахан дьахтарга “ковид” дьайыытын, оҕо төрөөтөҕүнэ, ханнык көмө миэрэлэрэ баалларын туһунан, о.д.а. ааҕыахха сөп.
Электроннай көрүҥнээх буолан, салгыы эбиллэн, хаҥатыллан биэрэн иһиэҕэ. Бу кинигэни оҥорорго урологтар, акушер-гинекологтар, психологтар, онтон да атын быраастар, тустаах министиэристибэлэр исписэлиистэрэ, юристар үлэлээтилэр.
Дьоҕус кинигэни ааҕар туһуттан, төлөпүөн камератын QR-куодка даҕайан баран, сканердыахха наада. Бу маннык ураты кинигэлэр поликлиникаларга, атын да уопсастыбаннай миэстэлэргэ сотору кэминэн баар буолуохтара.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru