Орловскай уобалас губернатора Андрей Клычков тохсунньу 15 күнүттэн “куйаар-код” систиэмэтин бүтүннүү уһуларын туһунан иһитиннэрдэ. Кини этэринэн, “куйаар-кодтар” бэйэлэрин соруктарын толорбуттар. Онон Орловскай уобалас Арассыыйаҕа “куйаар-коду” уһулбут бастакы эрэгийиэн буолуоҕа.
Ону тэҥэ, эрэгийиэҥҥэ маасканы кэтии эрэсиимэ оннунан хаалар. “Омикрон” штаммы учуоттаатахха, коронавирус өссө да сыстыганнаах, кутталлаах ыарыы буолар. Билигин уобаласка култуура, спорт тэрилтэлэригэр, киинэ тыйаатырдарыгар, атыы-эргиэн дьиэлэригэр киирэргэ “куйаар-код” ирдэнэр.
Уобаласка тохсунньу саҥатыттан күн аайы 95-110 киһи ыалдьара бэлиэтэнэр. Пандемия саҕаланыаҕыттан барыта 71 тыһыынча киһи ыалдьыбыт. Кэлэктиибинэй иммунитет – 74,33%-ҥа тэҥнэспит, барыта 400 тыһыынчаттан тахса киһи коронавируһу утары быһыыны ылбыт.
Саха сиригэр ахсынньыттан атыы-эргиэн кииннэригэр киирэргэ “куйаар-код” ирдэммэт буолбута, култуура, спорт тэрилтэлэригэр ирдииллэр.
Ангелина Васильева, “Саха сирэ” хаһыат, edersaas.ru
Хаартыска: mail.ru