Саха сирэ Арассыыйа судаарыстыбатын састаабыгар киирбитэ 385, автономнай өрөспүүбүлүкэ статуһун ылбыта 95 сылларыгар анаммыт Саха сирин Күннэрэ дойду тэбэр сүрэҕэр ситиһиилээхтик ыытыллаллар.
Бу тэрээһин чэрчитинэн, ахсынньы 16-17 күннэригэр Экспо-кииҥҥэ мас тардыһыытыгар аан дойду Кубогын түмүктүүр түһүмэҕэ буолар. Ил Дархан бирииһигэр норуоттар икки ардыларынааҕы күрэхтэһиигэ билиҥҥитэ 24 судаарыстыба мадьынылара кытталларын номнуо бигэргэттилэр.
Австрия, Армения, Бангладеш, Бразилия, Венгрия, Германия, Грузия, Индия, Казахстан, Кыргызстан, Латвия, Литва, Монголия, Новай Зеландия, Пакистан, Польша, Россия, Словакия, АХШ, Таджикистан, Узбекистан, Украина, Уругвай уонна Финляндия спортсменнара түһүлгэҕэ тахсаары ох курдук оҥосто сылдьаллар.
Роман Попов, “Саха сирэ” хаһыат