Бэс ыйын 8 күнүгэр Дьокуускайга “Өрөгөй” спорт киинин түһүлгэтигэр саха төрүт оонньуутугар — хапсаҕайга “Азия Куубага” диэн улахан турнир буолла. Бу күрэскэ бөҕөстөр хамаандаларынан 63, 75 уонна 95 киилэҕэ диэри ыйааһыннарга күүстэрин холостулар.
Түһүлгэҕэ Саха сирин бастыҥ хапсаҕайдьыттарын сэргэ, Соҕуруу Корея, Бурятия, Тыва уонна Монголия бөҕөстөрө хапсаҕайдаатылар. Оттон Саха сириттэн түөрт хамаанда турда. Ол курдук, быйылгы Петр Алексеев кэриэһигэр ыытыллыбыт хапсаҕайга өрөспүүбүлүкэ чөмпүйэнээтин түмүгүнэн үс бастакы миэстэни ылбыт улуустар – Үөһээ Бүлүү, Таатта, Сунтаар хамаандалара кытталлар. Ону тэҥэ, өрөспүүбүлүкэ хомуур хамаандата тэрилиннэ.
Үс ыйааһыҥҥа биирдии хапсаҕайдьыт баар. Аҕыс хамаанданы икки бөлөххө араартаан туһуннулар.
Бастакы миэстэни Саха сирин хомуур хамаандата уонна Тыва былдьастылар. 63 киилэҕэ диэри ыйааһыҥҥа кумахха тустууга аан дойду чөмпүйүөнэ Владислав Левчиков (Саха сирин хомуур хамаандата) уонна самбоҕа Арассыыйа, Европа чөмпүйүөнэ, спорт маастара Монгуш Субудай (Тыва) хапсаҕайдаатылар. Манна Левчиков хотторуу хомолтотун биллэ. Салгыы 75 киилэҕэ 2002 сыллаах көҥүл тустууга Арассыыйа чөмпүйүөнэ Прокопий Петров (Саха сирин хомуур хамаандата) уонна самбоҕа Арассыыйа, Европа чөмпүйүөнэ Ондар Аржаан (Тыва) киирсэн, Прокопий кыайыылаах таҕыста. Инньэ гынан, ахсаан 1:1 буолан, тэҥнэстилэр. Бүтэһик быһаарсыылаах киирсиигэ ааспыт сыл бастыҥ хапсаҕайдьыта, Бүлүү боотура Николай Николаев уонна Шойдун Субудай илин-кэлин түһүстүлэр. Уһун эрийсиилээх киирсии кэнниттэн Николай кыайда. Онон, хомуур хамаанда уолаттара тувинецтары 2:1 ахсааҥҥа кыайдылар.
Оттон үһүс миэстэни бүрээттэр Сунтаар улууһун хамаандатын кытта былдьастылар. Түмүккэ Сунтаар улууһа кыайыылаах таҕыста.
1 мисэтэ — Саха сирин хомуур хамаандата:
63 киилэҕэ — Владислав ЛЕВЧИКОВ;
75 киилэҕэ — Прокопий ПЕТРОВ;
95 киилэҕэ — Николай НИКОЛАЕВ.
2 миэстэ — Тыва хамаандата:
63 киилэҕэ — Айдыс МОНГУШ;
75 киилэҕэ — Аржаан ОНДАР;
95 киилэҕэ — Кайгаал-Оол ОНДАР.
3 мисэтэ — Сунтаар улууһун хамаандата:
63 киилэҕэ — Игорь ПЕТРОВ;
75 киилэҕэ — Айсен КИЛИБЕЕВ;
95 киилэҕэ — Павел ДОРОФЕЕВ.
Кыайыылаах хамаанданы тэрийээччилэр 300 тыһыынча солкуобай уу харчынан наҕараадалаатылар. Иккис – 150 тыһыынча солкуобай, үһүс 90 тыһыынча солкуобайы туттулар.
edersaas.ru