Уйбаан Белолюбскай бирииһигэр ыытыллар «Чөмпүйүөн Куубагар» өрөспүүбүлүкэбит аҕыс ааттаах спортсмена илин-кэлин түсүһүөҕэ. Бу күрэхтэһии Дьокуускай куоракка олунньу 10 күнүгэр «Триумф» спорт комплексыгар ыытыллыаҕа, киириитэ — босхо.
Үтүө үгэскэ кубулуйбут күрэхтэһии «Дыгын оонньууларын» сэттэ төгүллээх чөмпүйүөнэ Уйбаан Белолюбскай бирииһигэр ыытыллар. Манна сыллата бастыҥтан бастыҥ боотурдар күөн көрсөр биир бастыҥ спортивнай күрэхтэһиилэрэ буолар. Күрэхтэһии бырагырааматыгар сэттэ көрүҥ баар: «үс төгүл үс» ыстаҥа, оҕунан ытыы, тутум эргиир, мас-рестлинг, хапсаҕай, сүүрүү уонна ыараханы көтөҕүү.
Ааспыт сылга кыайыылааҕынан Хаҥалас улууһун ааттааҕа, «Дыгын оонньууларын» икки төгүллээх чөмпүйүөнэ Егор Филиппов буолбута. Быйыл кинини утары Нам улууһуттан Артем Варданян, Антон Тойтонов, Тааттаттан Николай Матаннанов, Амматтан Леонид Филиппов, Үөһүү Бүлүүттэн Алексей Иванов, Горнайтан Дьулустаан Ноговицын уонна Өлүөхүмэттэн Иннокентий Миронов күрэхтэһиэхтэрэ.
«Күрэхтэһиигэ кыттыыны спортсменнар рейтиннэрэ быһаарда, оттон норуот куоластааһынын түмүгэр Антон Тойтонов уонна Алексей Иванов кыттар быраабы ыллылар. Хомойуох иһин, Петр Старостин уонна Алексей Козлов быйыл кыттыбаппыт диэн быһаарыннылар. «Чөмпүйүөн Куубагын» кыайыылаахтара харчынан наҕараадаланыахтара», — диэн Уйбаан Белолюбскай СИА-ҕа иһитиннэрдэ.
«Чөмпүйүөн Куубага» Дьокуускайга олунньу 10 күнүгэр «Триумф» спорт комплексыгар күнүс 12.00 чаастан ыытыллыаҕа. Күрэхтэһиини кытта оҕолорго тутум эргииргэ турнир ыытыллара былааннанар.
КЫТТААЧЧЫЛАР:
Айтана Аммосова бэлэмнээтэ, edersaas.ru
Хаартыскалар: Интэриниэттэн.