Бу күннэргэ Дьокуускайга Щорс күөлүгэр кустары, хаастары, кубалары ыыттылар. Бу бырайыак “Кубалаах күөл” экопаарка диэн ааттанан, үһүс сылын үлэлиир.
edersaas.ru
Ол эрээри, тохтуу сылдьыбыт кэмнээх этэ. Онон куорат олохтоохторо бу сонуну үөрэ иһиттилэр. Кылгас кэм иһигэр “Кубалаах күөлгэ” дьон сөбүлээн сылдьар, сынньанар буолла. Ордук оҕолор сөбүлүүллэр, тыыннаах кустары көрөн үөрэллэр, аһаталлар, хаартыскаҕа түһэрэллэр. Оннооҕор сыбаайбалааччылар кэлэн хаартыскаҕа түһэр буолбуттар, дьиктитэ диэн, кубалар туус маҥан былаачыйалаах кийиит кыыһы көрдөхтөрүнэ, устан кэлэн, илииттэн кытта аһыыллар эбит.
Күөлгэ көҕөттөр, хоҥор хаастар, Пекин кустара, кубалар, московскай үрүҥ түөстээх уонна австрийскай көҕөттөр, уонтан тасха боруода көтөрдөр бааллар. Ону тэҥэ, Марха олохтооҕо Ирина Рыбкина бэйэтин хаһаайыстыбатыттан эбии 9 куһу аҕалан ыытта. Кэлин кус боруодатын барытын ылан ыытар баҕалаахтар. Таалай күөлгэ чөлүгэр түһэрэр, өрөмүөн үлэтэ бүттэҕинэ, онно эмиэ кустардаах экопаарка тэрийэргэ былаанныылларын туһунан Киин уокурук салайааччыта Матвей Торговкин эттэ.
Аан бастаан кустары “Байанай” сурунаал эрэдээксийэтэ тэрийбитэ. Бу кыра күөлгэ ким да наадыйбат этэ. Устунан дьон олус сөбүлээн сылдьар миэстэтигэр кубулуйда. Күннэтэ 300-тэн тахса, сайын устата 300 тыһыынча кэриҥэ киһи кэлэн барар.
Бу курдук куораппыт кэрэ-бэлиэ миэстэлэрэ үксүү турдуннар.
Ангелина ВАСИЛЬЕВА, “Саха сирэ” хаһыат, edersaas.ru