Аллайыаха Бөрөлөөҕөр Кыайыы Знамята тиийдэ

Ааптар: 
Бөлөххө киир:

Аллайыаха улууһун Бөрөлөөх нэһилиэгэр (баһылык А.Николаев) Кыайыы Знамятын вездеходунан илтилэр. Бөрөлөөххө киирэллэригэр знамяны вездеход үрдүгэр тэлээриччи анньан киирбиттэрин олохтоохтор бары сырсан кэлэн көрүстүлэр. Онтон олохтоох кулуупка Кыайыы Знамятын көрсүү үөрүүлээх чааһа буолла.

Ол кэнниттэн улуус баһылыга Яков Елисеев отчуоттаата. Туох үлэ-хамнас барбытын сырдатта. Нэһилиэнньэ олус көхтөөхтүк кытынна. Эдэр ыччат ыйытыылары эмиэ хото биэрдэ.
Дьэ, ыраах олорор бөрөлөөхтөрү туох долгутар эбитий? Кинилэр бэйэлэрин эрэ нэһилиэктэрин олоҕун туоһуласпатылар. Оленегорскайга төһө таба баарын, Чокуурдаахха таба этин ким атыылыырын ыйыттылар. Кыыл табаҕа уонна тайахха төһө көҥүл бэриллибитин ыйытыыларыгар айылҕа харыстабылын иниспиэксийэтин салайааччыта бэриллибит көҥүлтэн 9-гар сэрэбиэйдэһии барбытын эттэ.

Бөрөлөөх кырдьаҕас олохтоохторо кууһунан атыылыыр маҕаһыыҥҥа Дьокуускайтан “күөх рейс” кэллэҕинэ кыайан оҕуруот аһыгар эҥин тиксибэттэриттэн хомойоллор. Онон кырдьаҕастарга туспа уочаратынан атыылыахха, туспа муннук оҥоруохха диэтилэр. Маныаха социальнай харалта управлениета маҕаһыыны кытта бу боппуруоска кэпсэппит да, кууһунан атыылыыр маҕаһыын сайаапканан үлэлииртэн туттунар эбит. Эдэрдэри, бэл, Чокуурдаахха сибээс мөлтөҕө долгутар. Саатар, биир эпэрээтэр үчүгэйдик үлэлиирэ буоллар диэн баҕалаахтар. Оройуон дьокутааттарын оройуоннааҕы сэбиэтигэр Бөрөлөөхтөн дьокутаат суоҕун эттилэр. Нэһилиэк көхтөөх олохтооҕо Полина Рожина улуус нэһилиэктэрин баһылыктарыгар “Төгүрүк остуол” ыытары наадалааҕынан аахта. “Ити уопуту тарҕатыыга көмөлөөх буолуо этэ”, — диир кини.

Ити курдук, ыраах Бөрөлөөх олохтоохторо Кыайыы Знамятын көрсөн уонна долгутар ыйытыыларыгар хоруйдары истэн, астынан тарҕастылар.

Женни Стрюкова.

Хаартысканы Бөрөлөөхтөн тиксэрдилэр.

+1
0
+1
0
+1
0
+1
0
+1
0
+1
0
+1
0