Өктөөп өрөбөлүүссүйэтин 100 сылынан “Өктөөппүт сарыалын аннынан” диэн 100 кэлэктииби кытта көрсүһүүнү СӨ култууратын үтүөлээх үлэһитэ, «Бочуот Знага” орден кавалера Дмитрий Дмитриевич Тихонов салайааччылаах бөлөх тэрийэн тиһиктээхтик үлэлэһэ сылдьар. Ол чэрчитинэн, бэҕэһээ, Дьокуускайга “Школьный мир” бибилэтиэкэҕэ Сайсары уокуругун олохтоохторугар бэртээхэй тэрээһин буолла. Бу туһунан биһиэхэ бибилэтиэкэр Ольга Эртюкова иһитиннэрдэ.
Биһиги корр., “Саха сирэ” хаһыат, edersaas.ru
— Дмитрий Тихонов салайааччылаах бөлөххө сэрии сылларын оҕото, коммунист Александр Андреев, хомусчут Егор Андреев, баянист, Марк Жирков аатынан муусука кэллиэһин преподавателэ Валериан Емельянов бааллар. Кинилэр көрсүһүүнү тохсунньуттан саҕалаабыттар. Аллараа Бэстээххэ “Абалаах” санаторийга, Нам улууһугар Модукка, Бөтүҥҥэ, Мэҥэ-Хаҥалас, Амма улуустарыгар, Дьокуускай куорат тэрилтэлэригэр көрсүһүүлэри оҥорбуттар. Барыта 92 тэрилтэҕэ сылдьыбыттар, 3400 киһини хаппыттар, — диэн сырдатта.
Бибилэтиэкэҕэ буолбут тэрээһиҥҥэ Сэбиэскэй былаас олохтонуутун, комсомол туһунан бэрт интэриэһинэй сэһэргэһии тахсыбыт. Бөлөх кыттыылаахтара ырыа ыллаабыттар, хоһоон аахпыттар. Маныаха хас биирдии ырыа историятын билиһиннэрбиттэрин дьон-сэргэ улаханнык сэргээбит. Түмүккэ, бука бары ырыа ыллаан ньиргиппиттэр. Олус сэргэх, интэриэһинэй уонна билиини-көрүүнү биэрэр туһалаах көрсүһүүттэн сылдьыбыт дьон улаханнык астынан тарҕаспыттар.
Биһиги корр., “Саха сирэ” хаһыат, edersaas.ru