Хаҥалас улууһун Өктөм сэлиэнньэтин үөрэнээччилэрэ, учууталлара, олохтоохторо саҥа оскуола тутулларын уонтан тахса сыл кэтэстилэр. Саҥа кыһаҕа киирээри, эһиилги үөрэх дьылын долгуйа күүтэллэр.
Эргэ оскуола
Кылгастык этэн аастахха, П.И.Шадрин аатынан Өктөм орто оскуолата 1976 сыллаахха тутуллубут мас дьиэҕэ үлэлии олорор. Оскуола тиэхиньиичэскэй туругун чинчийии ааҕыгар олоҕуран, өссө 2012 сыллаахха саахалланар туруктааҕа биллибитэ. Өрөмүөн ыытыллан, былырыын бүрүөһүнүн уларытан, хамыыһыйа эргэ, ол эрээри, үөрэтиэххэ сөп диэн быһааран, күн бүгүн оҕолор бу оскуолаҕа үөрэнэллэр. Саҥа оскуолаҕа үктэнэр күннэригэр диэри баара-суоҕа биир сыл хаалла. Күн бүгүн туһааннаах оскуолаҕа 219 оҕо үөрэнэр, уһуйааҥҥа 84 оҕо сылдьар.
Саҥа оскуола-уһуйаан
Оскуола эргэрэн, уталыппакка саҥа тутуу барар кыһалҕата тирээбитэ. Онуоха эбии уһуйаан даҕаны эргэ дьиэҕэ үлэлии олорор буолан, оскуоланы уонна уһуйааны бииргэ тутарга быһаарыы ылыныллыбыта. Онон ааспыт сыл муус устарыгар саҥа оскуола-уһуйаан (220/100) бастакы сыбаайатын үөрүүлээх быһыыга-майгыга түһэрбиттэрэ. Аукциоҥҥа кыайан, генеральнай бэдэрээтчитинэн өрөспүүбүлүкэҕэ киэҥник биллэр “Сэттэ” ХЭУо буолан, тутуу хампаанньата ыытар саҕалаабыта. Тутуу уопсай иэнэ 5 100 кв миэтэрэ, икки мэндиэмэннээх. Остолобуойдаах, спортивнай саалалаах. Былаан быһыытынан эһиил саҥа үөрэх дьылын көрсө үлэҕэ киириэхтээх.
Улахан үлэтэ бүппүт
— Күн бүгүн тутуу көҥдөйө бүтэн турар. Иһигэр нарылыыр үлэтин бүтэрэрбит хаалан турар. Инженерията эҥин оҥоһуллан бүтэн эрэр. Билигин ититиитин салгыы оҥоробут. Аны саас кулун тутарга сылааһы киллэрэн, иһинээҕи үлэтин саҕалыахпыт. Тупсаран оҥоруу (благоустройство) алта уонча бырыһыана бүттэ. Хаалбыт үлэтин эмиэ эһиил ситэриэхпит. Уопсайынан, эбийиэк 80 бырыһыана бүтэн турар, — диэн “Сэттэ” ХЭУо тутар хампаанньа дириэктэрэ Николай Скрыбыкин кэпсиир.
Туох уратылааҕый?
Аҕыйах сылтан бэттэх, Саха сиригэр табыгастааҕынан биллэн, оскуола-уһуйааннары тутан эрэллэр. Хаҥалас улууһугар бу икки үөрэх кыһата биир дьиэҕэ үлэлиир бастакы тутуу буолар. Иккиһинэн, тутуу тас бараанын нарылыыр (отделочные) үлэтигэр итиэннэ тупсаран оҥорууга (благоустройство) аныгы матырыйаал туһаныллар диэн генеральнай дириэктэр бэлиэтиир. Манна даҕатан эттэххэ, “Сэттэ” тутуу хампаанньата дьоҥҥо-сэргэҕэ хаачыстыбалаах эрэ буолбакка, көрүөхтэн кэрэ көстүүлээх дьиэлэри дьэндэтэринэн биллэр. Онон саҥа эбийиэк үөрэнээччилэр, иитиллээччилэр, үлэһиттэр харахтарын үөрдэригэр саарбахтааһын суох. Аныгылыы истииллээх буолуо диэн эрдэттэн этиэххэ сөп.
Үөрэнээччи ахсаана эбиллэр
Оскуола дириэктэрэ Калиста Афанасьева: “Оҕобут ахсаана сыллата эбиллэн иһэр. Мин санаабар, саҥа оскуола үлэҕэ киирдэҕинэ, дьон көһөн кэлиитэ өссө үксүөҕэ. Эһиил 11-с кылааһы 11 оҕо бүтэрэр, оскуолаҕа 32 оҕо киирэр. Онон икки маҥнайгы кылааһы аһар былааннаахпыт. Быйыл эмиэ икки бастакы кылаас аһылынна”, — диэн билиһиннэрэр.
“Бэйэбит үөрэнээччилэрбит туталлар”
Өктөм 3 000 кэриҥэ киһи олорор улахан нэһилиэнньэлээх пуунунан биллэр. Оскуола уонна уһуйаан бииргэ холбоспут улахан (оскуола 220 миэстэлээх, уһуйаан 100 миэстэлээх) типовой бырайыак буолар. “Сэттэ” хампаанньа тэрийэн таһаарааччыта (учредитель) Андрей Джурович Данилов Өктөм оскуолатын бүтэрбитэ. Ону тэҥэ, Өктөм оскуолатын бүтэрбит элбэх киһи тутууга кыттар. Онон Өктөм оскуолатыттан кынат үүннэринэн тахсыбыт дьон тута сылдьаллар”, — диэн дириэктэр киэн тутта кэпсиир.
Кэлэр сылы долгуйа кэтэһэллэр
Манна даҕатан эттэххэ, Өктөм оскуолата өрөспүүбүлүкэҕэ мүөттээх ыҥырыаны иитиини саҕалаабыт бастакы оскуола буолар. Аҥаардас мүөт атыытынан эрэ дьарыктаммакка, сыыйа мүөттэн оҥоһуктарга ылсан, саҥа биисинэс-былааннары толкуйдууллар эбит. Үөрэнээччилэр саҥа оскуолаҕа киирэн былааннарын кэҥэтээри, балаҕан ыйын долгуйа кэтэһэллэр.
Людмила ПОПОВА, “Саха сирэ” хаһыат, edersaas.ru
[vc_images_carousel images=»196207,196208,196209,196211,196212″ img_size=»full»]