Хаҥалас улууһун П.И.Шадрин аатынан Өктөм орто оскуолата 1976 сыллаах тутуу. 2013 сылтан саахалланар туруктааҕа биллибитэ. Бу күннэргэ 220/100 миэстэлээх күүтүүлээх-кэтэһиилээх оскуола-уһуйаан маҥнайгы сыбаайатын түһэрдилэр.
edersaas.ru
Чахчы даҕаны, бырааһынньык. Күн чаҕылыччы тыган, бэлиэ күнү айхаллыырга дылы. Сүүрбэччэ сыл кэтэспит оскуолалара дьэ тутуллар кыахтанна. Тэрээһиҥҥэ СӨ Ил Дархана Айсен Николаев, Хаҥалас улууһун баһылыга Гаврил Алексеев, “Сэттэ” ХЭУо генеральнай дириэктэрэ Андрей Данилов, СӨ бырабыыталыстыбатын бэрэссэдээтэлин солбуйааччы Ольга Балабкина, дьокутааттар, миниистирдэр, тутааччылар, нэһилиэк олохтоохторо кытыннылар.
Алгысчыт Үрдүк Айыылартан көрдөһөн аал уоту аһатта, арыылаах алаадьынан айах тутта, уохтаах кымыһынан арчылаата.
Ил Дархан Айсен Николаев бастакы сыбаайа түспүтүнэн эҕэрдэлээн туран, нэһилиэк, улуус олохтоохторугар, өрөспүүбүлүкэ үөрэҕин сайдыытыгар үөрүүлээх күн буоларын эттэ: “2021 сыл балаҕан ыйын 1 күнүгэр дьоро түгэҥҥэ – оскуола аһыллыытыгар мустарбытыгар эрэнэбин. Күн бүгүн оҕолор хайдах усулуобуйаҕа үөрэнэ олороллорун бэркэ билэбит. Оскуола-уһуйаан хаачыстыбалаахтык кэмигэр тутуллан үлэҕэ киириэн баҕарабын. Үөрэххэ өрүү улахан болҕомтону ууруохпут. Кэнчээри ыччаппыт үүнүүтэ-сайдыыта – инники турар былааннарбытыттан биирдэстэрэ”.
Оскуола-уһуйаан дьиэтин маҥнайгы сыбаайата Хаҥалас улууһугар үөрэхтээһин тэриллибитэ 145 сылыгар сөп түбэһэн түспүтэ бэйэтэ ураты диэн бэлиэтээн туран, Хаҥалас улууһун баһылыга Гаврил Алексеев тустаах дьиэ тутуутун боппуруоһа оннуттан хамсыырыгар кылааттарын киллэрсибит дьоҥҥо барыларыгар махталын биллэрдэ.
Онтон оскуола дириэктэрэ Калиста Афанасьева, оскуолабытын Өктөм оскуолатын бүтэрбит Андрей Джурович Данилов салайааччылаах бэйэбит дьоммут туталлара икки бүк үөрүүлээх диэн тоһоҕолоон эттэ итиэннэ ис бараанын оҥоһуутунан (дизайнынан) өрөспүүбүлүкэҕэ биир бастыҥынан буолуоҕар эрэнэрин биллэрдэ. Оскуола үөрэнээччилэрэ махталларын бэлиэтин бэйэлэрэ илиилэринэн оҥорбут бэлэхтэрин туттардылар, хоһооннорун, ырыаларын анаатылар.
Эбийиэк икки мэндиэмэннээх, 5300 кв. миэтэрэ иэннээх буолара биллэр. Ханнык баҕарар аныгы ирдэбилгэ эппиэттиир оскуолалар курдук спортивнай, аактабай саалалардаах, туспа астыыр блоктаах диэн иһитиннэрдилэр.
Бочуоттаах сынньалаҥҥа олорор Татьяна Степанова: “Тус бэйэм үс түгэни бэлиэтиэм этэ. Бастатан туран, бүгүн Өктөм нэһилиэгин устуоруйатыгар бэлиэ күн буолла. Иккиһинэн, Ил Дархан Айсен Сергеевич Николаев бэйэтинэн кэлэн сыбаайаны түһэрсибитэ бэлиэ түгэн. Үсүһүнэн, саамай үөрүүлээҕэ диэн – Өктөм оскуолатын бүтэрбит Андрей Джурович Данилов оскуолабытын тутара. Кэрэ көстүүлээх, оҕолорбут билиигэ-көрүүгэ тардыһар кыһалара тутуллан тахсарын долгуйа кэтэһэбит”, — диэн санаатын үллэстэр.
Биллэн турар, саҥа дьиэни ордук кэтэһэр дьон – оскуола бүгүҥҥү үөрэнээччилэрэ. Бэһис кылаас үөрэнээччитэ Дайаана Балтынова икки сылынан үөрэх, билии аанын атыллыахтаах балта саҥа оскуолаҕа киирэр кыахтаммытыттан туохтааҕар да үөрэрин биллэрэр.
Людмила ПОПОВА, «Саха сирэ» хаһыат, edersaas.ru