Ыам ыйын 22 күнүгэр Хаҥалас улууһун Өктөм нэһилиэгин «Мэник Мэнигийээн» дьиэ кэргэн сынньанар сиригэр сүрдээх сэргэх тэрээһин буолан ааста.
edersaas.ru, Светлана Ксенофонтова
Сайылыкка киирии, Ньукуолун, Дьиэ кэргэн күнүн бииргэ ыллыбыт.
Самаан сайыммыт кэлбитин уруйдуу-айхаллыы алгыһынан, арыылаах алаадьынан, кымыстаах чороонунан, буруонан ыраастанан, салама ыйаан көрүстүбүт. Сиэри-туому аҕам саастаах дьоммут — «Эрэл» эбээлэр түмсүүлэрэ, уран тыллаах алгысчыт Андриан Семенович Белолюбскай, «Сардаҥа» түмсүү ыыттылар. Айылҕаҕа чэйдээн, ирэ-хоро кэпсэтэн дууһалыын астынныбыт. Түмсүүлэр норуот ырыаларынан, сахалыы кэрэ үҥкүүлэринэн эҕэрдэлээтилэр. Биһиги — «Дьол уйата» дьиэ кэргэн сайдыытын өйүүр түмсүү оҕолорбутунаан үҥкүүлээтибит уонна биһиэхэ холобур буолар дьиэ кэргэттэри: Юрий Николаевич уонна Федора Ивановна Фоминнары, Виталий Петрович уонна Ульяна Юрьевна Осиповтары бииргэ сүүс сүүстэриттэн өйөнсөн олорбуттара 40 сылларынан, кэрэ эйгэҕэ талаһыыларынан, үтүөнү-кэрэни тарҕатыыларынан биһиэхэ үтүө холобур буолалларынан, ис сүрэхтэн махтанан туран, эҕэрдэ сурук, кыракый бэлэх туттардыбыт.
Тэрээһиммитигэр Хаҥалас улууһун Уйулҕа киинин сэбиэдиссэйэ Анна Ивановна Иванова кэлэн бэйэни билии, сайыннарыы хайысхатыгар тренинг ыытта. Кыттыбыт дьон бэриллибит сорудаҕынан уруһуйдаат, бэйэлэрин туһунан өссө саҥаны билэн соһуйуу, үөрүү бөҕө буоллулар.
«Дьол түсчүтэ — Сахам сайдам ыала» күрэххэ үс ыал буолан кытынныбыт. Кривошапкиннар, Баишевтар уонна Ксенофонтовтар дьиэ кэргэн. Күрэх түмүгүнэн Кривошапкиннар бастакы миэстэ, иккис Ксенофонтовтар, үһүс Баишевтар буоллулар. Оҕолорбут бириис ылан үөрүүлэрэ үксээтэ.
Махтанабыт кэлбит ыалдьыттарбытыгар, тэрийээччилэрбитигэр, кыттааччыларбытыгар, быыс булан кэлэн көмө буолбут доҕотторбутугар!
Махтал!
Баҕарабыт барыгытыгар иллээх-эйэлээх, уйгу-быйаҥ олоҕу, сырдык, ыраас тапталы, эрэллээх доҕоттору! Бу сайыммыт өлгөм үүнүүлээх, быйаҥнаах буоллун!
Светлана Ксенофонтова, «Дьол уйата» дьиэ кэргэн сайдыытын өйүүр түмсүү салайааччыта