Бу сылы түмүктүү Хаҥалас улууһугар Өктөмҥө оскуола-саад үлэҕэ киириэхтээх.
Ярославскай уулуссатын 7 №-гэр ыытыллар тутуу кыраапык быһыытынан баран иһэр. Сыл бүтүүтүгэр тутуу түмүктэнэн, оҕолор манна сылдьыбытынан барыахтара диэн иһитиннэрэллэр. Эбийиэк «Үөрэх» национальнай бырайыагынан тутуллар.
Бэдэрээччит «Сэттэ» ХЭУо дьиэ ис өттүн оҥоһуутун саҕалаата. Тутуу билигин 75,5% бэлэм. Бу социальнай суолталаах тутуу үлэтэ 2019 сыллаахха кулун тутартан саҕаламмыта.
Дьиэ ис өттүгэр хостор быысаһар истиэнэлэрэ, быыстара оҥоһуллан, билигин түннүктэри, ааннары туруортаан бүтэрэн эрэллэр. Дьиэ ититиитэ, уота-күөһэ уута-хаара, канализацията тардыллыбыт.
Уопсайа 5325,5 кв. м. иэннээх икки мэндиэмэннээх дьиэ икки блоктаах: 100 оҕо сылдьарыгар уһуйаан уонна 220 миэстэлээх оскуола. Туспа киирэр ааннаах 1 331 кв. м. иэннээх оскуолаҕа киириэн иннинээҕи саастаах оҕолор сылдьар тэрилтэлэригэр, сүүрбэ биэстии миэстэлээх түөрт бөлөх баар буолар. Бастакы мэндиэмэҥҥэ кыра уонна орто бөлөхтөр, үлэһиттэр, логопед, психолог хосторо баар буолаллар. Иккис мэндиэмэҥҥэ — улахан уонна оскуолаҕа киириэн иннинээҕи саастаах оҕолор бөлөхтөрө, музыка уонна физкултуура саалалара, сэбиэдиссэй, методическай хостор, таҥас сууйтарар сир киирэллэр.
Оскуола уопсай иэнэ 3 994 кв. м. Сүүрбэлии оҕолоох уон биир кылааска суоттанар. Бастакы мэндиэмэҥҥэ туспа рекреациялаах алын сүһүөх кылаастар, учууталлар хосторо былааннаналлар. Маны сэргэ, черчение, биология, психолог, тириэньэрдэр хосторо уонна уолаттарга мастарыскыай киирэллэр. Өссө 121 миэстэлээх аһыыр саала, успуорт саалата баар буолуохтаах. Иккис мэндиэмэҥҥэ 154 миэстэлээх аактабай саала, информатика, лаборатория, мастарыскыай, дириэктэр, иитэр-үөрэтэр үлэҕэ сэбиэдиссэй, учууталлар хосторо уонна бибилэтиэкэ киирэллэр.
Үөрэх дьыла түмүктэнэн оҕолор сайыҥҥы сынньалаҥҥа баралларын кытта, тутуу үлэһиттэрэ эргэ оскуоланы көтүрбүтүнэн барыахтара. СӨ судаарыстыбаннай сакаасчытын сулууспата боломуочуйатынан, үлэни ыытыллыытын уонна эбийиэги бириэмэтигэр киллэрэллэрин хонтуруоллуур диэн СӨ Тутуу министиэристибэтин пресс-сулууспата иһитиннэрэр.
+1
+1
+1
+1
+1
+1
+1