Сыстыганнаах дьаҥ өрө туруута күүһүрэн, дьон кэлиҥҥи кэмҥэ көмпүүтэр томографията бары анаалыстардааҕар киһи коронавируска сутуллубутун чопчу быһаарар диэн санааҕа кэллэ. Ол түмүгэр муниципальнай поликлиникаларга уонна чааһынай мэдиссиинискэй кииннэргэ КТ-га түһүөн баҕалаах үксээтэ.
Дьиктитэ баара, тымныйыы сибикитэ биллэрин кытта, дьон КТ-га түһэ охсуон баҕата күүһүрдэ. Бу Саха сиригэр эрэ көстөр түбэлтэ буолбатах эбит. Бу туһунан эмчиттэр санааларын «Газета.ru» саайтка үллэһиннилэр.
Москваҕа былырыыҥҥыга холоотоххо, икки төгүл элбэх — 180 тыһыынча киһи КТ-га түспүт. Бу аҥаардас муус устартан бэс ыйыгар диэри. Эригийиэннэргэ эмиэ КТ-га түһүү ахсаана эмискэ элбээбит. Бу төрүөтэ, биллэн турар, ПЦР анаалыһа олус уһуннук тардылларын уонна «отрицательнай» диэн көрдөрүү КТ-га түстэххэ, олох атын хартыына буолан тахсарын кытта ыкса сибээстээҕэ чахчы.
Ол эрээри, үгүс дьон «ковид» хас да хонук буолан баран эрэ «баарын» биллэрэрин билбэккэ, эт-сиин температурата таҕыста, төбө ыарыйда, сэниэ суох буолла да, тута КТ-га түһэ охсорго тиэтэйэр буолла. Онно «ситэ» илик ыарыы КТ-га «туох да уларыйыы суох» диэни көрдөрөн баран, хас да хоноот, хам ылыан, эбэтэр көннөрү бронхит буолан хаалыан сөп.
Ити курдук, быраас анааһына суох КТ-га түһүү киһи организмыгар улахан буортуну аҕалыан сөп. Онон быраас «пневмония» диэн диагноһы туруоран эрэ баран, көмпүүтэр томографиятыгар ыытыахтаах. «КТ бастаан түһэргэ куттала суоҕун иһин, «облучениета» ренгеннээҕэр 2-5 төгүл олус күүстээх диэн терапевт-пульмонолог Марина Казакова санаатын үллэстэр. Кини этэринэн, ренгент сардаҥата рак ыарыыга тиэрдиэн сөп. «КТ буортута хас да сыл буолан баран биллэр. Дьиҥэр, биэс сыл буолан баран иккистээн КТ-га түһүөхтээхтэрин оннугар «ковидтаабыт» дьон тыҥаларын туругун билээри балыыһаҕа сытан эмтэнэр кэмнэригэр хаста да КТ-га түһэллэр. Бу, биллэн турар, организмҥа кутталлаах», — диэн эмчит санаатын салгыы эттэ.
Бу манан сибээстээн, Москваҕа, Башкирияҕа, Омскай уобаласка ыарыһахтары бастаан приёмнайга тиэрдиэхтэрэ. Онно эмчит ыарыһаҕы ренгеҥҥэ эбэтэр КТ-га ыытары бэйэтэ быһаарыаҕа. Ол кэнниттэн быраастар ыарыһаҕы хайдах эмтииргэ быһаарыыны ылыныахтара.
Елена ПОТОЦКАЯ, «Саха сирэ» хаһыат, edersaas.ru