Соторутааҕыта Арассыыйа олохтоохторо Төрүт Сокуоҥҥа уларытыылары киллэрии туһунан тус санааларын үллэстэн бараннар, Алексей Навальнайтан Twitter социальнай ситимҥэ «кулуттартан», «таҥнарыахсыттартан» атыннык ааттамматылар. Арассыыйа дьоно-сэргэтэ онтон улаханнык хомойдо, өһүргэннэ.
Суруйуулары аа5ан баран, Тулагы олохтооҕо, үлэ бэтэрээнэ Ксения Баишева санаатын үллэһиннэ:
—Дьону итинник ааттыыр хайдах даҕаны, сиэргэ баппат быһыы! Киһи эрэ хомойон ытыах курдук…
Улуу Кыайыы 75 сылыгар эйэлээх олоҕу уһансыбыт, бу сир үрдүгэр биһиги бука бары дьоллоохтук олорорбут туһугар олоҕун толук уурарын кэрэйбэккэ, хааннаах талабырдьыттартан Ийэ дойдутун көмүскээбит ытык кырдьаҕас, Аҕа дойду уоттаах сэриитин кыттыылааҕа Игнат Артеменко эмиэ ыарыылаахтык хаарылынна. Ытык дьоммут Төрүт Сокуоҥҥа уларытыыларга тус санааларын үллэстэн бараннар, тоҕо итинник үөҕүллэн хаалыахтаахтарый?
Мин — Кыайыы сылын оҕотобун. Онон киэн туттабын, онтон үөрэбин уонна ытык бэтэрээннэргэ сүһүөхтээх бэйэм сүгүрүйэбин, хоолдьуктаах бэйэм хоҥкуйабын. Кинилэр биһиэхэ бүгүҥҥү дьоллоох олоҕу оҥорсон, сэрии уот кутаатын ортотунан ааспыттара. Ыар сэрии хас биирдиибит дьоннорун-сэргэлэрин таарыйбыта. Мин түөрт убайым Аҕа дойду уоттаах сэриитигэр кыттыбыттара. Убайым Иннокентий Львович Кенигсберг куораты штурмалааһыҥҥа кыттыбыта. Улаханнык бааһыран баран дойдутугар эргиллибитэ. 1948 сыллаахха педагогическай институкка үөрэнэ сылдьан, сэриигэ ылбыт бааһыттан өлбүтэ. Биир убайым Данил Львович Волховскай фроҥҥа сэриилэспитэ. Эдэркээн киһи 1 группалаах инбэлиит буолан төрөөбүт дойдутун булбута. Ама, ону умнуом үһү дуо?!
Ийэ сирбит, эйэлээх олохпут олус чараас, уйаҥ эбээт! Бүгүҥҥү олохпутун, күлүмүрдүүр курустаал таастан чараас, уйаҥ эйгэни чочуйбут ытык бэтэрээннэрбитин харыстыаҕыҥ! Киһилии сиэрдээх буолуоҕуҥ!