Бүгүн Саха Өрөспүүбүлүкэтин күнүгэр Дьокуускай куорат киин болуоссаттарыгар өрөспүүбүлүкэ салалтата уонна уопсастыбаннаһа судаарыстыбаннаһы олохтоспут диэйэтэллэр пааматынньыктарыгар тыыннаах сибэкки дьөрбөтүн ууран чиэстээтилэр.
edersaas.ru
СӨ Бырабыыталыстыбатын Бэрэссэдээтэлэ Владимир Солодов саха норуотун чулуу уола, наука араас көрүҥнэригэр маҥнайгы оҥкулу оҥорбут чинчийээччи, гуманист-философ А.Е. Кулаковскай-Өксөкүлээх Өлөксөй пааматынньыгар уопсастыбаннаһы кытта сибэкки дьөрбөтүн уурда.
Кэрэхсэбиллээҕэ баар, саха литературатын төрүттээччи, улуу бөлөһүөк пааматынньыгар сибэкки уураары кыра оҕоттон саҕалаан, ыччакка, ытык мааны кырдьаҕаска тиийэ үгүс киһи кэлбит.
— Саха Өрөспүүбүлүкэтин историятыгар Алексей Елисеевич Кулаковскай култуурунай диэйэтэл, бэйиэт быһыытынан саха литературата сайдыытыгар эрэ буолбакка, саха тыла уонна литературата өрөспүүбүлүкэ судаарыстыбаннаһа олохтонуутугар сүҥкэн оруолун үрдэтэн, улахан кылаатын киллэрбитэ, — диэн бэйэтин этиитигэр бэлиэтээн туран, Владимир Солодов Сомоҕолоһуу сылыгар өрөспүүбүлүкэ дьоно-сэргэтэ олох хаачыстыбатын тупсарыыга, национальнай бырайыактары олоххо киллэриигэ биир санааҕа холбоһон үлэлииллэригэр ыҥырда.
Өрөспүүбүлүкэтээҕи «Үрүҥ көмүс волонтердар» диэн саастаах дьон уопсастыбаннай олоххо актыыбынастарын көҕүлүүр бырайыагы сүрүннүүр уопсастыбанньык, үс оҕолоох эдэр ийэ Маргарита Акимова Доҕордоһуу болуоссатыгар дьүөгэлэрин, СӨ Дьахталларын уопсастыбаннай тэрилтэлэрин сойууһун иһинэн үлэлиир лиидэр кыргыттар түмсүүлэрин кытта кэлбит.
— Мин уопсастыбанньык быһыытынан саха норуодунай бэйиэтэ Бүөтүр Тобуруокап Өксөкүлээх Өлөксөй туһунан тылларын өрүү саныыбын: «Суруйааччы норуокка оруолун Кулаковскайдыы толоруохха наада. Норуот олоҕунан олорон, норуот наадатын толкуйдаан, норуот өйдүүр, ылынар тылынан саҥаран, суруйааччы буолар сыччах соҕотох суоллаах. Ол суолу Өксөкүлээх оҕонньор биһиэхэ аспыта, кэрбэҥ анньыбыта…». Улуу киһибит аатынан элбэх үөрэх уонна культура тэрилтэлэрэ, куораттар уонна нэһилиэктэр уулуссалара ааттанан, норуоппут киэн туттар киһитин аата үйэтитилиннэ. Саха Өрөспүүбүлүкэтин күнүгэр Алексей Кулаковскай-Өксөкүлээх Өлөксөй аата дорҕоонноохтук ааттанарынан тус бэйэм киэн туттабын. Биһиги, саха лиидэр кыргыттара, «Өксөкүлээхтии олоруохха!» диэн санаанан салайтаран олорорго дьулуһабыт. Ол да иһин хас биирдиибит Сахабыт сиригэр туох эрэ туһалааҕы, үйэлээҕи оҥордорбут диэн санаалаах күннэтэ түбүгүрэбит,— диэн санаатын үллэһиннэ Маргарита Акимова.
Ити курдук, Өрөспүүбүлүкэбит күнэ хас биирдиибитигэр умнуллубат бэлиэ күнүнэн буолла.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Андрей Сорокин уонна ааптар түһэриитэ.