“ӨКСӨКҮЛЭЭХ саха тылын туһунан” саҥа кинигэ күн сирин көрдө

Бөлөххө киир:

Төрөөбүт тыл, сурук-бичик күнүгэр Дьокуускайга, Өрөспүүбүлүкэтээҕи  медиа-кииҥҥэ А.Е.Кулаковскай-Өксөкүлээх Өлөксөй  “Труды по якутскому языку” уонна “Ырыа-хоһоон” кинигэлэрин сүрэхтэниитэ буолла.

Биллэрин курдук, бу кинигэлэри Өксөкүлээх Өлөксөй сиэнэ, эһэтин баай литературнай, научнай нэһилиэстибэтин чинчийиигэ, тарҕатыыга, кини аатын үйэтитиигэ олоҕун анаабыт Людмила Реасовна Кулаковская хомуйан, бэлэмнээн, киирии тылларын, комментарийдарын сиһилии суруйан, бастакы эрэдээксийэлээһинин оҥорон хаалларбыта…  Кинигэни салгыы ситэри  Людмила Реасовна кыыһа Анастасия Александровна Кузнецова эрэдээксийэлээбит.

Хомуурунньукка, архыып фондаларыттан көстүбүт үлэлэр киирбиттэр. Ыстатыйаларга Алексей Кулаковскай саха тылын сайдыытын туһунан кэнсиэпсийэтэ арыллан көрдөрүллэр, Саха сиригэр ХХ үйэ 20-с сыллардааҕы тыл бэлиитикэтин проблемалара сырдатыллаллар.

Өксөкүлээх манна баар “Новая транскрипция якутского языка”, “Якутский язык”, “Русские слова, перенятые и усвоенные якутами (кроме собственных имен и названий)”, “Ол бу сирдэр, улуустар, уокуруктар тыллара. Наречия разных местностей, улусов и округов с прибавлением архаизмов, специальных охотничьих терминов, омонимов и синонимов”, “О происхождении слова “якут”,  “Правила якутского стихосложения”.., о.д.а.  ыстатыйалара, учуонайдары, устудьуоннары эрэ буолбакка, хайа баҕарар ааҕааччыны интэриэһиргэтиэхтэрэ.  Маны таһынан кинигэҕэ Өксөкүлээх  Э.К Пекарскайга, И.С.Говоровка, С.А.Новгородовка, И.Н.Бараховка, П.А.Ойуунускайга  суруктара бааллар.

Өксөкүлээх Өлөксөй  саха тылыгар научнай үлэлэрэ “Историческая память” партийнай бырайыак чэрчитинэн итиэннэ “Саханефтегазсбыт” АУо генеральнай дириэктэрэ, Ил Түмэн дьокутаата  И.Ю.Никитин үбүнэн өйөбүлүнэн, туспа кинигэ буолан таҕыстылар.

Филологическай наука доктора, академик Петр Слепцов итиэннэ филолоическай наука доктора, литературовед Прасковья Сивцева бэйэлэрин этиилэригэр, Людмила Реасовна Кулаковская бу тиһэх үлэтигэр Өксөкүлээх научнай үлэлэрэ, суруктара олус дьоһуннаахтык, дириҥник бэриллибиттэрин, кинигэ суолталаах өрүттэрин бэлиэтээтилэр. Учуонайдар, ураты сыаналааҕынан бу кинигэҕэ Людмила Кулаковская оҥорбут комментарийдара буолаллар, диэтилэр.

Кинигэ сүрэхтэниитин “Сахамедиа” РИИХ”  АУо генеральнай дириэктэрин солбуйааччы  Афанасий Ноев иилээн-саҕалаан ыытта. Тэрээһиҥҥэ Өксөкүлээх Өлөксөй сиэннэрэ Раиса Реасовна, Лариса Реасовна Кулаковскаялар, хос сиэннэр, аймахтар, учуонайдар, тыл үөрэхтээхтэрэ кыттыыны ыллылар, санаа атастастылар.

СӨ Бырабыыталыстыбатын бэрэссэдээтэлин солбуйааччы Михаил Гуляев  көрсүһүүгэ тыл эттэ итиэннэ бу дьоһуннаах кинигэ күн сирин көрүүтүнэн эҕэрдэлээн туран,  “Саханефтегазсбыт” АУо генеральнай дириэктэрэ, Ил Түмэн дьокутаата  Игорь Никитиҥҥэ, Людмила Реасовна кыыһа Анастасия Кузнецова-Кулаковскаяҕа СӨ Ил Дарханын Махтал cуруктарын туттарда.

Татьяна МАРКОВА, «Саха сирэ» хаһыат, edersaas.ru

Ааптар хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0