Мин оҕо сылдьан Реас Кулаковскай кэргэнин Татьяна Паповнаны тыыннаахтыы көрбүт дьоллоохпун. Кини оччолорго номнуо аарыма кырдьаҕас, эбэм үбүлүөйүгэр кэлэн хонон-өрөөн дьаарбайан барбыта. Оччолорго саха литературатын оскуолаҕа саҥардыы үөрэтэн, сэҥээрэн эрэр кэмим этэ.
«Ити эбэҕэр ыалдьыттаабыт Өксөкүлээх кийиитэ», — диэн дьонум кэпсээбиттэригэр, Татьяна Паповна сырдык мөссүөнүн күн бүгүнүгэр диэри өйдөөн хаалбыппын…
Саха литературатын төрүттээччи, төрөөбүт тылын, устуоруйатын чинчийээччи, норуот уус-уран айымньытын утумнаахтык хомуйааччы, сырдатааччы, айар тыл аҕата А.Е.Кулаковскай – Өксөкүлээх Өлөксөй 145 cыллаах үбүлүөйэ. Суруйааччы төрөөбүт дойдутугар Тааттаҕа Ытык Күөлгэ Таатта литературнай уус-уран мусуой-заповеднигар, Өксөкүлээх төрөөбүт балаҕаныгар бэҕэһээ улуус дьаһалтата, ытык киһи сыдьааннара, уһуйаан, оскуола оҕолоро, улуус олохтоохторо кыттыылаах тэрээһин буолан ааста.
Саха өрөспүүбүлүкэтин бастакы бэрэсэдьиэнэ М.Е.Николаев оскуолаларын ситимин көҕүлээһининэн, сыл ахсын кулун тутар 16 күнүгэр «Өксөкүлээх күнэ” диэн халандаарга үрдүк суолталаах бэлиэ күн буоларын ситиһэр туһуттан Таатта олохтоохторо бу тэрээһини тэрийдилэр.
Аны мантан ыла Өксөкүлээх күнэ диэн кулун тутар ыйга бэлиэтэнэр бэлиэ күн чахчы даҕаны, саха дьонугар олус да суолталаах буолуоҕа.
Ульяна ЗАХАРОВА.
Изабелла СИВЦЕВА хаартыскаларын архыыбыттан туһанылынна.