Өксөкүлээҕи суруйбут Арассыыйа суруйааччыта Николай Коняев олохтон туораата

Бөлөххө киир:

Балаҕан ыйын 16 күнүгэр нуучча биллиилээх суруйааччыта,  Арассыыйа Суруйааччыларын сойууһун бырабылыанньатын сэкирэтээрэ, Санкт-Петербург суруйааччыларын Православнай уопсастыбаларын бэрэссэдээтэлэ Николай КОНЯЕВ 70 сааһыгар сылдьан ыалдьан өлбүтүн туһунан Петербурдааҕы Суруйааччылар дьиэлэрин саайтыгар биллэрдилэр.

Кини биһиэхэ, Саха сирин олохтоохторугар, тугунан ордук чугаһый, сыһыаннааҕый? Прозаик, публицист Николай Михайлович Коняев – улуу Өксөкүлээх Өлөксөй туһунан 2011 сыллаахха “Молодая гвардия”  издательствоҕа “ЖЗЛ”  сиэрийэнэн тахсыбыт “Алексей Кулаковский” кинигэ ааптара буолар. Кини саха суруйааччыларын кытта элбэхтик алтыспыта, үгүстэрин кытта доҕордуу сыһыаннааҕа.

Саха омук национальнай култууратын уонна үгэстэрин, абыычайдарын уратыларын үчүгэйдик өйдөөн, дьыаланы дириҥник билэр буолан, кини Өксөкүлээх Өлөксөй биографиятын олус дьаныһан, талааннаахтык суруйбута.

Коняев бастыҥ айымньылара английскай, немецкэй, французскай, кытай, персидскэй тылларга тылбаастаммыттара. Кини талааннаахтык суруйбут арамааннарын уонна сэһэннэрин иһин Василий Шукшин аатынан Судаарыстыбаннай бириэмийэни, Андрей Платонов аатынан бириэмийэни,  ВЦСПС бириэмийэтин, «Наш современник», «Молодая гвардия», «Север», «Студенческий меридиан» о.д.а. сурунааллар сыллааҕы бириэмийэлэрин туппута.

Николай Коняев, далааһынынан уонна суолталааҕынан улуу нуучча классиктарын үлэлэрин кытта тэҥҥэ дьүөрэлэһэр баай литературнай нэһилиэстибэтэ үйэлэри уҥуордуоҕа.

ЫСПЫРААПКА

Коняев Николай Михайлович 1949 сыллаахха атырдьах ыйын 25 күнүгэр Ленинградскай уобалас Вознесенье бөһүөлэгэр күн сирин көрбүтэ.

А.М.Горькай аатынан Литературнай институту бүтэрбитэ.

Кини бастакы кэпсээнэ 1974 сыллаахха  «Молодой Ленинград» альманахха бэчээттэммитэ.

1979 сыл — Эдэр суруйааччылар VII Бүтүн Сойуустааҕы сүбэ мунньахтарын кыттыылааҕа.

1984 -1986 с.с. «Беларусьфильм» киностудияҕа уонна «Советский писатель» издательствоҕа эрэдээктэринэн үлэлээбитэ.

1986 -1988 с.с. — «Нева» сурунаалга проза салаатын сэбиэдиссэйэ.

Николай Коняев – РФ Суруйааччыларын сойууһун VI съеһин, Арассыыйа суруйааччыларын VIII уонна IX сийиэстэрин, Суруйааччылар сойуустарын Норуоттар икки ардыларынааҕы холбоһуктарын II уонна III сийиэстэрин дэлэгээтэ.

Уһуннук «Молодая гвардия», «Роман-журнал XXI век», «Проза», «Немига литературная», «Родная Ладога» сурунааллар, «Литературный Петербург» хаһыат, «Русское воскресение» сервер редакционнай сүбэлэрин чилиэнэ этэ.

edersaas.ru

+1
0
+1
0
+1
0
+1
0
+1
0
+1
0
+1
0