Крым уонна Саха сирэ экэнэмиичэскэй пуорумҥа эригийиэннэри кытта бииргэ үлэлээһин чэрчитинэн бииргэ үлэлээһин хайысхатын торумнаатылар.
Саха Өрөспүүбүлүкэтэ уонна Крым Өрөспүүбүлүкэтэ бииргэ үлэлээһин Боротокуолугар атыы-эргиэн, научнай-техническай, социальнай-култуурунай хайысхаларынан үлэни киллэрдилэр. Ил Дархан Айсен Николаев уонна Крым Өрөспүүбүлүкэтин баһылыга Сергей Аксёнов суолталаах докумуоҥҥа 2025 сылга диэри илии баттастылар. Өрүттэр экэниэмикэ уонна инвестиционнай бэлиитикэ эйгэтигэр уопут атастаһыахтара уонна бииргэ үлэлээһин тосхолун тобулуохтара, Ялтатааҕы норуоттар икки ардыларынааҕы экэнэмиичэскэй пуорумҥа бииргэ кыттыыны ылыахтара. Маны таһынан икки өрөспүүбүлүкэ ювелирнай салааҕа бииргэ үлэлиэхтэрэ. Ол курдук, Саха сиринээҕи ювелирнай хампаанньалар Крымҥа анал ювелирнай маҕаһыыннары арыйан, күндү сыаналаах таастан, сэлии муоһуттан уонна бриллиантан оҥоһуктары атыылыахтара,
Кэккэ бырайыак суол инфраструктуратыгар, фруктаны уонна оҕуруот аһын салгын аалынан таһыыга олоххо киириэҕэ. Маны таһынан, үөрэх кыһаларыгар преподавателлэри атастаһыыга, Тиксии уонна Зелёнай Мыс муора пуортарыгар исписэлиистэр баахтанан үлэлэрин тэрийиэхтэрэ.
Оҕо сынньалаҥын тэрийиигэ эмиэ үлэ ыытыллыаҕа. Ити курдук, Крым уонна Саха сирэ кэскиллээх хайысхаларга бииргэ үлэлээһиннэрэ саҕаланна.
Елена ПОТОЦКАЯ, «Саха сирэ» хаһыат, edersaas ru