Кулун тутар 18 күнүгэр Крым Өрөспүүбүлүкэтэ уонна Севастополь куорат Арассыыйа састаабыгар холбоспута алтыс сыла бэлиэтэнэр.
edersaas.ru
2013 сыллаахха сэтинньигэ Украина судаарыстыбатыгар бэлитиичэскэй кириисис саҕаламмыта. Украина официальнай былааһа Евросойууһу кытта сөбүлэҥ түһэрсииттэн аккаастаммытын иһин, евроинтеграция өттүгэр буолааччылар бэрэсидьиэни ууратары туруорсубуттара. Бу долгун Киев куораттан саҕаланан Украина атын эрэгийиэннэригэр, куораттарыгар тарҕаммыта.
Ол эрээри Крым автономнай өрөспүүбүлүкэтин былааһа оппозицияны өйүүртэн аккаастаммыта.
Олунньу 22 күнүгэр Украина бэрэсидьиэнэ Виктор Янукович кириэһилэтин хаалларан, Киевтан барбыта. Бэрэсидьиэн эбээһинэһин Үрдүкү рада саҥа спикерэ Александр Турчинов толорор буолбута. Нуучча тылын эрэгийиэннээҕи таһымыгар сыһыаннаах дьыалаҕа сокуону дьокутааттар уларытаннар, нууччалыы саҥарар нэһилиэнньэлээх Украина соҕуруулуу-илиҥҥи олохтоохторугар улахан айдаан тахсыбыта.
Бу кэмҥэ Крым арыытын олохтоохторо Украина саҥа былааһын утаран өрөспүүбүлүкэ Үрдүкү сэбиэтин дьиэтин иннигэр бырачыастаан миитин тэрийбиттэрэ. Кинилэр ирдэбиллэрэ диэн Крымы Украинаттан араарар сорук этэ. Маны сэргэ Севастополь куоракка эмиэ миитиннээбиттэрэ.
Олунньу 26 күнүгэр Симферопольга Крым парламенын таһыгар саҥа былаас уонна нууччалыы саҥарар Крым олохтоохторун икки ардыларыгар киирсии түмүгэр, 30 киһи эчэйбитэ, икки киһи суорума суолламмыта. Үрдүкү сэбиэт үлэтэ тохтотуллубута. Нөҥүө күнүгэр, парламент үлэтэ саҥаттан сөргүтүллүбүтүн кэннэ , Анатолий Могилев салалталаах бырабыыталыстыбаны ууратан «Русское единство» диэн олохтоох хамсааһын лидерин Сергей Аксеновы премьер-миниистиринэн талбыттара.
Кулун тутар 1 күнүгэр Сергей Аксенов Арассыыйа бэрэсидьиэнигэр Владимир Путиҥҥа Крым арыытыгар эйэлээх эйгэни олохтуурга көмө көрдөөн сурук суруйбута.
Ол күн Арассыыйа Федерациятын сэбиэтэ сөбүлэҥин биэрэн Украинаҕа уопсастыбаннай-бэлитиичэскэй балаһыанньа намырыар диэри Арассыыйа сэбилэниилээх күүһүн биэрбитэ.
Кулун тутар 6 күнүгэр Крым Үрдүкү сэбиэтэ Арассыыйа бэрэсидьиэнигэр сурук суруйан Арассыыйа састаабыгар Крым өрөспүүбүлүкэтин субъект быһыытынан киллэрэр уонна кулун тутар 16 күнүгэр референдум тэрийэр туһунан көрдөһүү сурук суруйбута. Кулун тутар 11 күнүгэр Крым автономнай өрөспүүбүлүкэтин уонна Севастополь куорат Украинаттан тутулуга суохтарын туһунан декларация баттаммыта.
Кулун тутар 17 күнүгэр өрөспүүбүлүкэ үрдүкү сэбиэтэ Крымы тутулуга суох суверенитеттаах судаарыстыба быһыытынан уурааҕа ылыныллыбыта. Докумуоҥҥа сурулларынан, Крым Өрөспүүбүлүкэтэ Арассыыйа саҥа субъегын быһыытынан киирбитэ.
Ол күн Арассыыйа бэрэсидьиэнэ Крым Өрөспүүбүлүкэтин Арассыыйа састаабыгар ылыммытын туһунан ыйааҕа тахсыбыта.
Кулун тутар 18 күнэ Крым Өрөспүүбүлүкэтэ уонна Севастополь куорат Арассыыйа састаабыгар киирэн холбоһуулара Арассыыйа устуоруйатыгар хаалыаҕа.
Онтон ыла кулун тутар 18 күнэ Крым Арассыыйаны кытта холбоспут үөрүүлээх күнэ бэлиэтэнэр буолбута.
Ульяна ЗАХАРОВА, edersaas.ru