Аҕыс сыллааҕыта, 2014 сыл кулун тутар 18 күнүгэр Крым эрэгийиэнэ Арассыыйаҕа холбоспута. Бу бэлиэ күҥҥэ “Крым сандал сааһа” диэн тэрээһиннэр дойду бары куораттарыгар, сэлиэнньэлэригэр буоллулар.
Дьокуускайга Комсомольскай болуоссат былаахтаах дьонунан туолбут. Өрөгөйдөөх муусука, өрө көтөҕүллүүлээх ырыа-тойук иһиллэр. Болуоссакка киириигэ полициялар иилии тураллар, сааны-сэби бэрэбиэркэлиир араамкалар нөҥүө ааһаҕын.
“Бэйэбит дьоммутун бырахпаппыт!”, “Модун Арассыыйа туһугар!”, “Эйэ туһугар!” диэн саҥалар иһиллэллэр. Бу үөрүүлээх күнүнэн мустубут дьону Ил Дархан Айсен Николаев, куорат аҕа баһылыга Евгений Григорьев эҕэрдэлээтилэр. Кинилэр уустук кэмҥэ бары түмсэр, биир санааланар улахан суолталааҕын, эйэни олохтуур, национализмы суох гынар туһугар күүһү түмэр наадалааҕын эттилэр. Севастополь куоракка «Якутская», оттон Дьокуускайга «Севастопольская» уулуссалар бааллара бу икки эрэгийиэн ситимнэрин көрдөрөр.
Эстрада тыйаатырын артыыстара, норуодунай ансаамбыллар өрө көтөҕүллүүлээх, патриотическай тыыннаах ырыалары ыллаан, дьон санаатын көтөхтүлэр. Дьон хас биирдии этиини, ырыаны “ураа”, “уруй-айхал” хаһыыларынан атаардылар. Төһө да сытыы тыаллаах күн буоллар, манна элбэх эдэр дьон, кадеттар, уопсастыбанньыктар, араас омуктар бэрэстэбиитэллэрэ мустубуттар. Үгүстэр национальнай таҥастарын таҥнан кэлбиттэрэ сиэдэрэйдик көстөр.
Тэрээһин элбэх киһилээх улахан оһуохайынан түмүктэннэ. Дьокуускай олохтоохторо бүтүн дойду үрдүнэн барбыт аахсыйаҕа кыттыһан, Крым, Донбасс, Луганскай олохтоохторугар өйүллэрин биллэрдилэр.
Ангелина Васильева, “Саха сирэ” хаһыат, edersaas.ru
Хаартыска: ааптар түһэриилэрэ.