Биэс сыллааҕыта «Кружалоҕа» ювелирнай маҕаһыыны халаабыт киһини туттулар
Дьокуускай куорат олохтоохторо өйдүүр буолуохтаахтар, 2014 сыллаахха «Кружало» атыы-эргиэн киинигэр бриллианнары атыылыыр ювелирнай маҕаһыыҥҥа хабыр халааһын тахсыбытын.
Күнүс хара ачыкылаах киһи ювелирнай маҕаһыыннартан биирдэстэригэр киирэн, бөдөҥ тэрилтэ генеральнай дириэктэрэбин диэн, улахан бриллианнаах эр киһи биһилэхтэрин көрдөрөллөрүгэр көрдөспүт.
Салон атыылааччылара эппиттэринэн, бу киһи сотору кэминэн тэрилтэлэрин салайааччытын үбүлүөйэ буоларынан, дьоһуннаах бэлэх оҥоруохтарын баҕаралларын кэпсээбит.
Атыылааччылар, ювелирнай оҥоһуктары атыылыыр быраабылалары кэһэн, кини иннигэр хас да биһилэҕи ууран биэрбиттэр.
Онуоха бу киһи биһилэхтэри көрбүтэ буола туран, эмискэ хаһы да хаба тардан ылаат, атахха биллэрбит. Салон харабыла туох буолбутун өйдөөбөккө да хаалбыт.
Ити чахчынан РФ Холуобунай кодексатын 161-с ыст. 3-с чааһынан, ол эбэтэр, халааһын бэлиэтэ баарынан, холуобунай дьыала тэриллэн силиэстийэлэнэ сылдьар.
Дьокуускай куорат полициятын холуобунай ирдэбилгэ оперативниктара уорбаланааччыны хас да сылы быһа көрдөөбүттэрэ. Буруй арыллыытыгар салоҥҥа баар видеокамера да көмөлөспөтөх — уоруйах кыһаллан бэлэмнэнэн, киһи билбэт гына, парик уонна хара ачыкы кэтэн кэлбит.
Дьэ, ол эрэн, 31 саастаах уорбаланааччы син биир тутулунна.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.